دنیا کا حیران کن شہر، جہاں سورج 84 دن تک غروب نہیں ہوگا

امریکی ریاست الاسکا کے انتہائی شمال میں واقع شہر اُتقیاغوک، جسے پہلے بیرو کہا جاتا تھا، وہاں سورج 10 مئی کو آخری بار غروب ہوا اور اب 2 اگست تک مسلسل آسمان پر چمکتا رہے گا۔

رپورٹس کے مطابق 10 مئی کو مقامی وقت کے مطابق رات ایک بج کر 48 منٹ پر سورج غروب ہوا، لیکن صرف 69 منٹ بعد دوبارہ طلوع ہوگیا۔

اس کے بعد اب وہاں کئی ہفتوں تک رات کی مکمل تاریکی نہیں ہوگی، اس منفرد قدرتی مظہر کو مڈ نائٹ سن یعنی آدھی رات کا سورج کہا جاتا ہے۔

یہ شہر آرکٹک سرکل میں واقع ہے، جہاں ہر سال گرمیوں کے موسم میں سورج کئی دنوں تک غروب نہیں ہوتا، ماہرین کے مطابق زمین کے جھکاؤ اور قطبی علاقوں کی جغرافیائی پوزیشن کی وجہ سے یہ حیرت انگیز منظر دیکھنے کو ملتا ہے۔

دلچسپ بات یہ ہے کہ یہی شہر سردیوں میں بالکل مختلف صورتحال کا سامنا کرتا ہے، نومبر میں سورج غروب ہونے کے بعد تقریباً 64 دن تک دوبارہ طلوع نہیں ہوتا، جس دوران پورا علاقہ مسلسل تاریکی میں ڈوبا رہتا ہے۔ اس کیفیت کو قطبی رات کہا جاتا ہے۔

یہ بھی پڑھیں:ٹرمپ نے جنگ بندی کی امریکی تجاویز پر ایران کا جواب مسترد کر دیا

قدرت کے اس انوکھے نظام نے دنیا بھر کے لوگوں کی توجہ اپنی جانب مبذول کر لی ہے جبکہ سیاح بھی اس نایاب منظر کو دیکھنے کیلئے ہر سال الاسکا کا رخ کرتے ہیں۔