ٹرمپ نے جنگ بندی کی امریکی تجاویز پر ایران کا جواب مسترد کر دیا
امریکی صدر ڈونلڈ ٹرمپ نے ٹروتھ سوشل پر بیان جاری ایک بیان میں کہا کہ ابھی ایران کے نام نہاد "نمائندوں" کی طرف سے دیا گیا جواب پڑھا ہے جو مجھے بالکل پسند نہیں آیا ، یہ مکمل طور پر ناقابلِ قبول ہے۔
علاوہ ازیں امریکی میڈیا کو دیے گئے ایک انٹرویو میں صدر ڈونلڈ ٹرمپ کا کہنا تھا کہ ایران کا افزودہ یورینیم امریکا کی مکمل سرویلئنس میں ہے،ایران کو کبھی افزودہ یورینیم تک پہنچنے نہیں دیں گے،جب چاہے امریکا ایران کے افزودہ یورینیم تک پہنچ سکتا ہے۔
انہوں نے کہا کہ اگر ہمیں لگا کہ کوئی افزودہ یورینیم کے قریب جانے کی کوشش کر رہا ہے تو اسے اڑا دیں گے۔
امریکی صدر کے بیان پر ایران کی جانب سے جاری ردعمل میں کہا گیا کہ ٹرمپ کو مطمئن کرنا ہمارا کام نہیں ، ٹرمپ ایران کے جواب سے مطمئن نہیں تو یہی بہتر ہے ، ہمارا مسودہ ٹرمپ کو خوش کرنے کیلئے نہیں۔
ایرانی حکام کی جانب سے مزید کہا گیا کہ مذاکراتی ٹیم کو ہدایت کی ہے کہ وہ مذاکرات کے دوران اپنی قوم کی بہتری کیلئے تجاویز دیں۔
یہ بھی پڑھیں: ایران نے پاکستان کے ذریعے امریکی تجاویز کا جواب دیدیا
ایرانی وزارت خارجہ کے ترجمان اسماعیل بقائی نے کہا کہ امریکی مطالبات کے باعث مذاکراتی عمل پیچیدہ ہوتا جا رہا ہے، پاکستان خطے میں پیشہ ورانہ انداز میں ثالثی کا کردار ادا کررہا ہے، جبکہ ایران نے امریکی تجاویز کا جواب خطے کے مفادات کو مدنظر رکھتے ہوئے دیا۔
انہوں نے یہ بھی کہا کہ امریکا کے غیرمعقول مطالبات اور اقدامات سے خطے میں بے چینی اور عدم استحکام پیدا ہو رہا ہے، ایران سفارتکاری کو ترجیح دیتا ہے تاہم اگر لڑنے پر مجبور کیا گیا تو بھرپور جواب دیا جائے گا۔
