تعلیمی ماہرین کے مطابق درست حکمت عملی، مکمل دستاویزات اور مناسب پروگرام کے انتخاب کے ذریعے طلبہ کم GPA کے باوجود کینیڈا کے کالجز اور یونیورسٹیوں میں داخلہ حاصل کر سکتے ہیں۔

رپورٹس کے مطابق متعدد کینیڈین ادارے ایسے طلبہ کو بھی داخلہ دیتے ہیں جن کا CGPA 2.0 تک ہو، بشرطیکہ ان کا اسٹیٹمنٹ آف پرپز، تجربہ اور IELTS اسکور مضبوط ہو۔

ماہرین کا کہنا ہے کہ کم CGPA رکھنے والے طلبہ کے لیے کینیڈین کالجز ایک بہتر آپشن ہیں، جہاں ڈپلومہ اور سرٹیفکیٹ پروگرامز نہ صرف آسانی سے دستیاب ہوتے ہیں بلکہ بعد ازاں یونیورسٹی میں منتقلی کا راستہ بھی فراہم کرتے ہیں۔

اسی طرح ماسٹرز کے خواہشمند طلبہ پوسٹ گریجویٹ ڈپلومہ یا گریجویٹ سرٹیفکیٹ پروگرامز کے ذریعے اپنی تعلیم جاری رکھ سکتے ہیں جو داخلہ کے لحاظ سے نسبتاً آسان اور عملی مہارتوں پر مبنی ہوتے ہیں۔

ماہرین نے زور دیا ہے کہ طلبہ ایک مضبوط SOP تیار کریں جس میں اپنی تعلیمی کارکردگی، بہتری اور مستقبل کے اہداف کو واضح انداز میں پیش کریں، جبکہ انٹرن شپس، ملازمت کا تجربہ اور اضافی سرٹیفکیٹس کے ذریعے اپنی پروفائل کو بہتر بنائیں۔

انگریزی زبان کی مہارت کے لیے IELTS میں کم از کم 6.5 بینڈ حاصل کرنا فائدہ مند قرار دیا گیا ہے جو داخلے کے امکانات کو بڑھاتا ہے۔

رپورٹ میں یہ بھی کہا گیا ہے کہ طلبہ کو زیادہ مقابلہ والے پروگرامز کے بجائے عملی نوعیت کے کورسز اور کالج پاتھ ویز کا انتخاب کرنا چاہیے اور اپنی تعلیمی بہتری کو نمایاں کرنا چاہیے۔

یہ بھی پڑھیں: ڈاکٹر فضیلہ عباسی منی لانڈرنگ کیس، حمزہ علی عباسی کا بیان آگیا

ماہرین نے خبردار کیا ہے کہ صرف بڑی یونیورسٹیوں میں درخواست دینا، کمزور SOP جمع کروانا، اہلیت کو نظر انداز کرنا اور پروگرامز پر تحقیق نہ کرنا عام غلطیاں ہیں جن سے بچنا ضروری ہے۔

یہ رہنمائی خاص طور پر ان طلبہ کے لیے مفید ہے جن کا CGPA 2.0 سے 2.8 کے درمیان ہے، جو پہلے مسترد ہو چکے ہیں، فیلڈ تبدیل کرنا چاہتے ہیں یا کم بجٹ میں بیرون ملک تعلیم حاصل کرنا چاہتے ہیں۔

کینیڈا میں سالانہ داخلوں کے تین بڑے سیشنز فال (ستمبر)، ونٹر (جنوری) اور سمر (مئی) پر مشتمل ہوتے ہیں، اور طلبہ کو ہدایت کی گئی ہے کہ وہ داخلے کی آخری تاریخ سے کم از کم 6 سے 8 ماہ قبل درخواست جمع کروائیں۔

ماہرین کے مطابق کامیابی کے لیے ضروری ہے کہ طلبہ بغیر تحقیق کے درخواست دینے کے بجائے اپنے تعلیمی پروفائل کے مطابق پروگرام کا انتخاب کریں تاکہ داخلہ اور ویزا کے امکانات میں اضافہ ہو سکے۔