غیر ملکی میڈیا کے مطابق سپیکر نے آج پارلیمنٹ تحلیل کرنے کا باضابطہ طور پر نوٹیفکیشن جاری کیا ہے، پارلیمنٹ کی تحلیل کے بعد 12 روزہ انتخابی مہم کا آغاز آئندہ منگل سے کیا جائے گا۔
خیال رہے کہ سنائے تاکائچی اکتوبر میں جاپان کی پہلی خاتون وزیرِ اعظم منتخب ہوئی تھیں اور تین ماہ کے قلیل عرصہ میں ان کی مقبولیت کی شرح تقریباً 70 فیصد بتائی جا رہی ہے، وہ اپنی ذاتی مقبولیت کو استعمال کرتے ہوئے حکمران جماعت کی پوزیشن مزید مضبوط کرنے کی خواہاں ہیں۔
بین الاقوامی میڈیا رپورٹس کے مطابق حکمران اتحاد، جس میں لبرل ڈیموکریٹک پارٹی (ایل ڈی پی) اور جاپان انوویشن پارٹی شامل ہیں، ایوانِ زیریں میں معمولی اکثریت رکھتا ہے۔
یہ بھی پڑھیں: جاپانی وزیراعظم کا اسمبلی تحلیل کر کے 8 فروری کو الیکشن کا اعلان
عالمی میڈیا رپورٹس کے مطابق جاپانی عوام کی سب سے بڑی تشویش مہنگائی ہے، دوسری جانب جاپانی سرکاری نشریاتی ادارے کے مطابق انتخابی مہم میں مہنگائی پر قابو اور چین کے ساتھ بڑھتی کشیدگی اہم موضوعات ہوں گے۔
واضح رہے کہ جاپانی وزیرِ اعظم تاکائچی نے نومبر میں تائیوان سے متعلق بیان کے بعد چین جاپان تعلقات میں کشید گی پیدا ہوئی، اس کے بعد چین نے جاپان کے خلاف معاشی اور سفارتی اقدامات اٹھائے تھے۔
