یہ واقعہ اتوار کے روز سڈنی کے معروف ساحلی مقام بانڈی بیچ پر پیش آیا جہاں یہودی اپنے مذہبی تہوار ہانوکا کی تقریب میں شریک تھے، اسی دوران دو مسلح افراد نے اچانک تقریب پر اندھا دھند فائرنگ شروع کر دی جس کے نتیجے میں حملہ آور سمیت 12 افراد ہلاک جبکہ 29 افراد زخمی ہونے کی اطلاع ہے۔

رپورٹس کے مطابق ایک حملہ آور ساحل پر موجود پُل نما جگہ سے فائرنگ کرتا رہا جبکہ دوسرا ملزم پارکنگ ایریا میں درختوں کے پیچھے چھپ کر لوگوں کو نشانہ بناتا رہا، واقعہ کے دوران ساحل پر خوف و ہراس پھیل گیا اور لوگ جان بچانے کے لیے ادھر ادھر بھاگتے رہے۔

اسی دوران سفید شرٹ میں ملبوس ایک شہری نے غیر معمولی بہادری کا مظاہرہ کیا، ویڈیو فوٹیج میں دیکھا جا سکتا ہے کہ وہ پارکنگ میں کھڑی گاڑیوں کے درمیان چھپتے ہوئے آگے بڑھا اور اچانک فائرنگ میں مصروف ایک حملہ آور پر جھپٹ پڑا، اس شہری نے نہ صرف حملہ آور کو قابو کیا بلکہ اس کے ہاتھ سے اسلحہ بھی چھین لیا۔

اسلحہ چھن جانے کے بعد حملہ آور زمین سے اٹھا اور پیچھے موجود اپنے ساتھی کی طرف بھاگنے لگا تاہم اس شہری کے بروقت اقدام نے مزید خونریزی کو روک دیا، واقعے کی ویڈیو منظرِ عام پر آنے کے بعد دنیا بھر میں اس شخص کی جرات کو بے حد سراہا جا رہا ہے۔

یہ بھی پڑھیں: سڈنی کے ساحل پر فائرنگ، 12 افراد ہلاک، 17 زخمی

مقامی میڈیا کے مطابق اس بہادر شہری کی شناخت 43 سالہ احمد ال احمد کے نام سے ہوئی ہے، جو دو بچوں کے والد ہیں اور سدرلینڈ میں پھلوں کی دکان چلاتے ہیں ۔

احمد ال احمد کے رشتہ دار مصطفیٰ نے بتایا کہ احمد ال احمد کو واقعے کے دوران دو گولیاں لگیں اور انہیں فوری طور پر ہسپتال منتقل کیا گیا جہاں ان کا علاج معالجہ جاری ہے، ڈاکٹرز کے مطابق ان کی حالت اب خطرے سے باہر ہے۔

مصطفیٰ نے میڈیا سے گفتگو کرتے ہوئے کہا کہ احمد کو اسلحہ چلانے کا کوئی تجربہ نہیں، وہ محض وہاں سے گزر رہے تھے کہ حالات دیکھ کر انہوں نے یہ جرات مندانہ فیصلہ کیا، احمد ایک حقیقی ہیرو ہیں جن کے اقدام نے بے شمار زندگیاں بچا لیں۔

نیوز ساؤتھ ویلز کے وزیرِاعلیٰ کرس منس نے بھی احمد ال احمد کی بہادری کو خراجِ تحسین پیش کرتے ہوئے کہا کہ ایسا منظر انہوں نے اپنی زندگی میں کبھی نہیں دیکھا، یہ ایک ناقابلِ یقین اقدام تھا جس کی بدولت کئی خاندان اجڑنے سے بچ گئے۔

یہ بھی پڑھیں: سڈنی حملے کے پس پردہ پاکستان دشمن پراپیگنڈا کی کہانی بے نقاب

آسٹریلوی حکام نے اس واقعے کو دہشت گردی قرار دیا ہے، پولیس کے مطابق ایک حملہ آور موقع پر ہلاک ہو گیا جبکہ دوسرا زخمی حالت میں زیر حراست ہے۔

ادھر پاکستان کے صدر آصف علی زرداری اور وزیراعظم شہباز شریف نے بھی سڈنی میں پیش آنے والے افسوسناک واقعہ پر گہرے دکھ اور افسوس کا اظہار کیا ہے۔

صدر مملکت آصف علی زرداری نے آسٹریلوی حکومت اور عوام کے ساتھ یکجہتی کا اظہار کرتے ہوئے کہا کہ پاکستان خود دہشت گردی کا شکار رہا ہے اور معصوم شہریوں پر حملوں کی سخت مذمت کرتا ہے۔

وزیراعظم شہباز شریف نے اپنے بیان میں کہا کہ پاکستان دہشت گردی کی ہر شکل کی مذمت کرتا ہے اور اس مشکل گھڑی میں آسٹریلیا کے عوام اور حکومت کے ساتھ کھڑا ہے۔