بھارت کے گودی میڈیا نے ایک مرتبہ پھر مودی سرکار کی نااہلی چھپانے کیلئے دبئی ایئرشو کے دوران جنگی طیارے تیجس کے حادثہ کی ذمہ داری امریکی انجن پر ڈال دی،جنرل (ر) بخشی اور ارنب گوسوامی طیارہ حادثہ کی ذمہ داری امریکی انجن پر ڈال کر بھارت کی دفاعی کمزوری چھپانے کی کوشش میں لگے رہے۔

بھارتی صحافی ارنب گوسوامی نے کہا کہ امریکا کی جانب سے جی ای 404 انجن کی تاخیر سے فراہمی نے بھی بھارت کی دفاعی تیاری میں خطرناک خلا پیدا کر دیا، تیجس امریکی جنرل الیکٹرک کے بنائے ہوئے انجن سے چلتا ہے اور جنرل الیکٹرک بھارت کا کبھی دوست نہیں رہا۔

گوسوامی کا کہنا تھا کہ امریکی حکومت نے تیجس کیلئے اگلی نسل کے انجنوں کی ڈلیوری سست کرنے کی کوشش کی، امریکا ایل سی اے پروگرام اور تیجس کو ایک خطرہ سمجھتا ہے۔

یہ بھی پڑھیں: بھارتی فضائیہ کے طیارہ حادثے کی ابتدائی رپورٹ سامنے آگئی

دوسری جانب جنرل (ر) بخشی نے گیدڑ بھبھکی کستے ہوئے کہا کہ آپ نہیں جانتے کب سندور 2 دوبارہ بھڑک اٹھے، جی ای 404 انجن ہمیں دو سال پہلے مل جانا چاہیے تھا، ہم نے ایک ارب ڈالر نقد ادا کیے ہیں لیکن اس کے باوجود ابھی تک ہمیں صرف دو انجن ملے ہیں۔

دفاعی تجزیہ کاروں کا کہنا ہے کہ بھارتی سرکار اور اس کا گودی میڈیا اپنی ان حرکات کی وجہ سے نا صرف جگ ہسائی کا سبب بنتے ہیں بلکہ بھارتی عوام کی توجہ کو بھی اصل مسائل کی طرف سے ہٹاتے ہیں، اس ذاتی سیاسی اور معاشی مفاد کی خاطر بھارت ایک خطرناک بند گلی میں داخل ہوتا جا رہا ہے۔

تجزیہ کاروں نے مزید کہا کہ امریکا پر ملبہ ڈالنا بارآور ثابت نہیں ہوا، طیارہ حادثہ بھارتی دفاعی صنعت کی ناکامی کا واضح عکاس ہے۔