رپورٹ کے مطابق متحدہ عرب امارات میں ہفتہ وار تعطیل ہفتہ اور اتوار کو ہوتی ہے۔ اس سال چونکہ یکم دسمبر پیر اور 2 دسمبر منگل کے دن آ رہی ہیں، اس لیے یہ دونوں تعطیلات ہفتہ اور اتوار کی پہلے سے موجود چھٹیوں کے ساتھ مل کر مجموعی طور پر چار مسلسل چھٹیاں بن جائیں گی۔ اس طرح یو اے ای کے شہری جمعہ کے روز کام کے بعد مسلسل چار دن کا وقفہ انجوائے کر سکیں گے، جس سے نہ صرف گھریلو مصروفیات پوری ہوں گی بلکہ گھومنے پھرنے، سیاحت اور خاندانی میل جول کے مواقع بھی بڑھ جائیں گے۔
یہ بھی پڑھیں: شیخ حسینہ واجد کو ایک اور کیس میں سزائے موت
عرب میڈیا کے مطابق مختلف سرکاری اور نیم سرکاری اداروں نے بھی قومی دن کے موقع پر خصوصی تقریبات اور سرگرمیوں کا اہتمام کرنے کا فیصلہ کیا ہے۔ یو اے ای کا قومی دن روایتی طور پر بھرپور تقریبات، پریڈز، آتش بازی، ثقافتی نمائشوں اور فیملی ایونٹس کے ساتھ منایا جاتا ہے۔ بڑے شاپنگ مالز، پارکس اور پبلک اسپاٹس پر لائٹس اور جھنڈیوں سے خصوصی سجاوٹ بھی کی جاتی ہے۔
دوسری جانب وزارتِ تعلیم نے بھی اعلان کیا ہے کہ ملک بھر کے سرکاری اور نجی سکولوں میں یکم اور 2 دسمبر کو تعطیل ہوگی۔ اس فیصلے سے لاکھوں طلبہ و طالبات کو بھی طویل ویک اینڈ میسر آئے گا۔ وزارتِ تعلیم کے مطابق سکول 3 دسمبر کے بعد معمول کے مطابق دوبارہ کھل جائیں گے۔
یو اے ای میں مقیم غیر ملکی شہریوں، مزدور پیشہ افراد اور اوورسیز کمیونٹی کے لیے بھی یہ چھٹیاں غیر معمولی اہمیت رکھتی ہیں، کیونکہ انہیں بھی آرام اور خاندان کے ساتھ وقت گزارنے کا موقع ملتا ہے۔ مختلف کمپنیوں نے ملازمین کو چھٹیوں کے دوران محفوظ سفر اور احتیاطی تدابیر پر عمل کرنے کی ہدایات بھی جاری کی ہیں۔
