میڈیا رپورٹس کے مطابق رانیل وکرماسنگھے زیرِ تفتیش بیان ریکارڈ کروانے سی آئی ڈی کے دفتر پہنچے تھے جہاں انہیں حراست میں لیا گیا، سابق صدر کو کولمبو فورٹ مجسٹریٹ کے سامنے پیش کیا جائے گا۔

سی آئی ڈی حکام کے مطابق 2023 میں وکرماسنگھے نے اپنی اہلیہ کی ایک برطانوی یونیورسٹی کی تقریب میں شرکت کے لیے لندن کا دورہ کیا تھا جس کے اخراجات مبینہ طور پر ریاستی خزانے سے ادا کیے گئے۔

حکام نے بتایا کہ اس نجی دورے کے دوران ان کے محافظوں کے اخراجات بھی سرکاری خزانے سے پورے کیے گئے تھے تاہم وکرماسنگھے کا مؤقف ہے کہ اہلیہ کے سفری اخراجات انہوں نے خود برداشت کیے اور سرکاری فنڈز استعمال نہیں کیے۔

یہ بھی پڑھیں: گھانا: ملٹری ہیلی کاپٹر تباہ، 2 وزراء سمیت 8 افراد ہلاک

یاد رہے کہ 2022 میں سری لنکا کی بگڑی معاشی صورتحال کے بعد عوام سڑکوں پر نکل آئے تھے اور انہوں نے صدر گوٹابایا راجا پاکسے کے مستعفی ہونے کا مطالبہ کیا تھا۔

راجا پاکسے کے مستعفی ہونے کے بعد پر سری لنکا کی پارلیمان نے رانیل وکرماسنگھے جولائی 2022ء میں صدر منتخب کیا تھا تاہم مظاہرین ایک بار پھر سڑکوں پر نکل آئے تھے اور انہوں نے رانیل وکرما سنگھے کو صدر قبول کرنے سے انکار کردیا تھا۔