لاکھوں مسلمانوں نے عید کی نماز ادا کی، جبکہ حج کی ادائیگی کے مراحل بھی اپنے عروج پر ہیں۔ مکہ مکرمہ کی مقدس مسجد الحرام اور مدینہ منورہ کی مسجد نبوی میں نماز عید کے روح پرور اجتماعات منعقد ہوئے جن میں دنیا بھر سے آئے ہوئے حجاج کرام اور مقامی شہریوں نے شرکت کی۔
عیدالاضحیٰ کی نماز کے دوران خطبات میں اتحاد بین المسلمین، قربانی کی روح اور حضرت ابراہیمؑ و حضرت اسماعیلؑ کی عظیم قربانی کی یاد تازہ کی گئی۔ خطیبوں نے امت مسلمہ کو آپس میں بھائی چارے، رواداری اور قربانی کی اصل روح کو اپنانے کی تلقین کی۔ مسجد الحرام میں نماز عید کے دوران خصوصی سیکیورٹی انتظامات کیے گئے تھے، جبکہ حرم کے اندرونی اور بیرونی حصے نمازیوں سے بھر گئے تھے۔
یہ بھی پڑھیں: بدعت، غیبت، تکبر اور جھوٹ سے دور رہیں ، خطبہ حج
دوسری جانب، حجاج کرام مناسک حج کے اہم مرحلے میں داخل ہو چکے ہیں۔ عرفات میں وقوف اور مزدلفہ میں قیام کے بعد آج صبح حجاج کرام منیٰ پہنچ رہے ہیں۔ منیٰ میں وہ جمرہ عقبہ یعنی بڑے شیطان کو کنکریاں ماریں گے، جو کہ حضرت ابراہیم علیہ السلام کی سنت کی یادگار ہے۔ اس عمل کے بعد حجاج جانوروں کی قربانی کریں گے اور پھر سر منڈوا کر یا بال کترا کر احرام کھول دیں گے۔
قربانی کے بعد حجاج طواف زیارت کے لیے مکہ مکرمہ جائیں گے اور سعی مکمل کر کے اپنے حج کے دیگر ارکان پورے کریں گے۔ سعودی حکام کے مطابق حج کے تمام انتظامات بحسن و خوبی انجام پا رہے ہیں اور کسی بھی ہنگامی صورتِ حال سے نمٹنے کے لیے انتظامیہ اور رضاکار ہر وقت موجود ہیں۔
واضح رہے کہ پاکستان، بھارت، بنگلہ دیش اور دیگر جنوبی ایشیائی ممالک میں عیدالاضحیٰ کل یعنی ہفتے کو منائی جائے گی، تاہم خلیجی ممالک میں آج ہی عید کا پہلا دن ہے۔ لاکھوں مسلمان سنت ابراہیمی کی یاد میں جانوروں کی قربانی دے رہے ہیں اور اللہ کی رضا کے لیے عبادات میں مشغول ہیں۔
