یہ واقعہ ویتنام کے دارالحکومت ہنوئی کے ہوائی اڈے پر اس وقت پیش آیا جب فرانسیسی صدر کا سرکاری طیارہ لینڈ کرنے کے بعد دروازہ کھولا گیا۔ جیسے ہی دروازہ کھلا، صدر میکرون پہلے نظر آئے، تاہم فوراً ہی ان کی اہلیہ بریجٹ میکرون نے اپنا ہاتھ ان کے چہرے کے سامنے لا کر انہیں پیچھے ہٹنے کا اشارہ کیا، جس پر میکرون پیچھے ہو گئے۔
چند لمحوں بعد میکرون ایک مرتبہ پھر دروازے پر نمودار ہوئے اور اس بار وہ سرخ لباس میں ملبوس اپنی اہلیہ کے ساتھ نظر آئے، جیسے دونوں باضابطہ طور پر طیارے سے باہر آنے کا پروٹوکول نبھا رہے ہوں۔ اس موقع پر ایئرپورٹ پر موجود سیکیورٹی اہلکار اور استقبالیہ عملہ بھی حیرت زدہ نظر آیا، کیونکہ یہ لمحہ رسمی اور سنجیدہ موقع پر غیر متوقع طور پر غیر رسمی بن گیا۔
یہ بھی پڑھیں: خطرناک سامان سے لدا بحری جہاز بھارتی ساحل کے قریب ڈوب گیا
ابھی یہ واضح نہیں ہو سکا کہ یہ خاتون اول کی جانب سے محض ایک مزاحیہ انداز تھا یا کسی ناراضی یا غلط فہمی کا اظہار، تاہم اس لمحے کی ویڈیو تیزی سے سوشل میڈیا پر وائرل ہوگئی ہے اور صارفین اس پر طرح طرح کے تبصرے کر رہے ہیں۔
کچھ صارفین کا کہنا ہے کہ یہ محض ایک دوستانہ اور غیر رسمی لمحہ تھا جسے بلاوجہ سنجیدہ بنایا جا رہا ہے، جبکہ دیگر افراد نے اسے ایک عجیب سفارتی لمحہ قرار دیا ہے جس میں صدر کو اپنی ہی اہلیہ کے ہاتھ سے پیچھے ہٹنا پڑا۔
اس واقعے نے نہ صرف فرانسیسی میڈیا بلکہ بین الاقوامی حلقوں کی بھی توجہ حاصل کر لی ہے، اور سوشل میڈیا پلیٹ فارمز پر میمز، تبصروں اور تجزیوں کا سلسلہ جاری ہے۔ کئی لوگوں نے اس واقعے کو "سفارتی شگوفہ" قرار دیا ہے، جو سرکاری دوروں کی رسمی سنجیدگی میں ایک دلچسپ موڑ بن کر سامنے آیا۔
