مقبوضہ کشمیر میں قابض بھارتی فوج کا ظلم دن بہ دن بڑھتا جا رہا ہے، بھارتی فوجیوں نے جموں میں مزید تین کشمیری نوجوان شہید کر دیئے، نوجوانوں کو اکھنور میں محاصرے اور تلاشی کی کارروائی کے دوران شہید کیاگیا، اکھنور میں آپریشن کے بعد دوسرے دن بھی سرچ آپریشن جاری ہے۔
اس سے قبل اسی علاقے میں بھارتی فوج کی ایک گاڑی پر حملہ ہوا، بھارتی فوجیوں نے کپواڑہ میں ایک نوجوان گرفتار کر لیا، نوجوان کو محاصرے اورتلاشی کی کارروائی کے دوران گرفتار کیا گیا، بے گناہ کشمیریوں کو گرفتارکرنے کے لئے مقبوضہ کشمیر میں اس طرح کی کارروائیاں ایک معمول بن چکی ہیں، 5 اگست 2019 سے اب تک 25 ہزار سے زائد کشمیریوں کو گرفتار کیا گیا ہے۔
کشمیر میڈیا سروس کی رپورٹ کے مطابق ہندوستانی حکومت کی آر ایس ایس پر مبنی پالیسیاں علاقائی ہم آہنگی کے لیے ایک اہم خطرہ ہیں، کئی دہائیوں سے، بھارت تنازعہ کشمیر کے پرامن حل میں رکاوٹیں ڈال رہا ہے، جنوبی ایشیا بھارتی محاذ آرائی کی وجہ سے عدم استحکام کا شکارہے، جموں و کشمیر پر بھارت کا وحشیانہ قبضہ جنوبی ایشیا میں امن کی راہ میں رکاوٹ ہے، جنوبی ایشیاء میں امن، عوام کی خواہشات کے مطابق مسئلہ کشمیر کے حل سے مشروط ہے۔
