فیس بک سروس پاکستان سمیت دنیا بھر میں متاثر
سروس میں خرابی کو مانیٹر کرنے والی ویب سائٹ ڈاؤن ڈیٹیکٹر کے مطابق دنیا بھر میں متعدد صارفین نے فیس بک کے استعمال میں مسائل کی شکایات درج کرائیں۔ صارفین کو لاگ اِن کرنے، پوسٹس لوڈ کرنے اور دیگر فیچرز استعمال کرنے میں دشواری کا سامنا کرنا پڑا۔
ڈاؤن ڈیٹیکٹر نے سماجی رابطے کی ویب سائٹ ایکس پر جاری پیغام میں بتایا کہ دنیا کے مختلف حصوں سے صارفین کی جانب سے فیس بک سروس میں خرابی کی رپورٹس موصول ہوئی ہیں۔ تاہم ابتدائی طور پر سروس متاثر ہونے کی اصل وجہ سامنے نہیں آ سکی۔
پاکستان میں بھی متعدد صارفین نے فیس بک کے اچانک متاثر ہونے کی شکایات کیں، جس کے بعد سوشل میڈیا پر صارفین کی جانب سے اس حوالے سے مختلف تبصرے سامنے آنے لگے۔
فیس بک کی ملکیتی کمپنی میٹا کی جانب سے تاحال سروس میں خلل کی وجہ یا بحالی کے حوالے سے کوئی باضابطہ بیان جاری نہیں کیا گیا۔
ٹیکنالوجی ماہرین کے مطابق بڑے سوشل میڈیا پلیٹ فارمز پر کبھی کبھار تکنیکی مسائل کے باعث عارضی تعطل پیدا ہو جاتا ہے، جسے متعلقہ ٹیمیں فوری طور پر حل کرنے کی کوشش کرتی ہیں۔
یہ بھی پڑھیں:پاکستانیوں کیلئے چیٹ جی پی ٹی سے 50 ہزار ڈالر جیتنے کا موقع
واضح رہے کہ فیس بک دنیا بھر میں اربوں صارفین رکھنے والا بڑا سوشل میڈیا پلیٹ فارم ہے، جہاں روزانہ کروڑوں افراد رابطے، معلومات کے تبادلے اور مختلف سرگرمیوں کے لیے اس کا استعمال کرتے ہیں، سروس میں معمولی تعطل بھی بڑی تعداد میں صارفین کو متاثر کر سکتا ہے۔
