پاکستانیوں کیلئے چیٹ جی پی ٹی سے 50 ہزار ڈالر جیتنے کا موقع
عالمی ٹیکنالوجی کمپنی OpenAI نے اپنے خصوصی بائیو باؤنٹی پروگرام کیلئے اہل ممالک کی فہرست میں پاکستان کو بھی شامل کر لیا ہے، جس کے بعد پاکستانی ماہرین بھی اس بین الاقوامی پروگرام میں شرکت کے اہل ہوں گے۔
اس پروگرام کے تحت منتخب محققین جدید مصنوعی ذہانت کے ماڈلز میں حیاتیاتی سیکیورٹی سے متعلق ممکنہ کمزوریوں اور خطرات کی نشاندہی کریں گے۔ پروگرام میں نمایاں کارکردگی دکھانے والے ماہرین کو 50 ہزار امریکی ڈالر تک کا انعام دیا جائے گا۔
اوپن اے آئی کے مطابق بائیو باؤنٹی پروگرام عام صارفین کیلئے نہیں بلکہ ایسے افراد کیلئے تیار کیا گیا ہے جو مصنوعی ذہانت، سائبر سیکیورٹی، ریڈ ٹیمنگ اور حیاتیاتی تحفظ جیسے شعبوں میں تجربہ رکھتے ہیں۔ اس اقدام کا مقصد اے آئی سسٹمز کو ممکنہ غلط استعمال سے مزید محفوظ بنانا اور حفاظتی نظام کو مضبوط کرنا ہے۔
پروگرام میں شرکت کے خواہشمند پاکستانی ماہرین کو سب سے پہلے ایک مختصر درخواست فارم مکمل کرنا ہوگا، جس میں ذاتی معلومات، ملک، تعلیمی یا پیشہ ورانہ وابستگی اور متعلقہ تجربے کی تفصیلات فراہم کرنا ہوں گی۔ درخواست گزار کیلئے فعال چیٹ جی پی ٹی اکاؤنٹ ہونا بھی ضروری ہے۔
یہ بھی پڑھیں:ورلڈ کپ فائنل کی گھاس بھی فروخت کا فیصلہ، قیمت کیا ہوگی؟
اوپن اے آئی درخواستوں کا جائزہ لینے کے بعد منتخب امیدواروں کو خصوصی پلیٹ فارم تک رسائی فراہم کرے گا، جہاں کام شروع کرنے سے پہلے انہیں رازداری کے معاہدے پر دستخط کرنا ہوں گے۔ اس کے بعد شرکاء مخصوص ہدایات کے مطابق اے آئی ماڈلز کی جانچ کریں گے اور ممکنہ حفاظتی خامیوں کی رپورٹ پیش کریں گے۔
