میٹا کا پرانے اینڈرائیڈ اسمارٹ فونز پر واٹس ایپ بند کرنے کا اعلان

اس فیصلے سے دنیا بھر میں لاکھوں صارفین متاثر ہو سکتے ہیں، خاص طور پر وہ افراد جو 10 سے 11 سال پرانے موبائل فون استعمال کر رہے ہیں۔

رپورٹس کے مطابق اینڈرائیڈ 5 اور اینڈرائیڈ 5.1 چلانے والے فونز پر 8 ستمبر 2026 کے بعد واٹس ایپ کی سپورٹ ختم ہو جائے گی۔ اس کے علاوہ اینڈرائیڈ 6 سے پرانے آپریٹنگ سسٹمز پر یکم جنوری 2026 سے ہی پابندیاں شروع ہو جائیں گی اور بعد میں مکمل طور پر سروس بند کر دی جائے گی۔

ٹیکنالوجی ماہرین کے مطابق واٹس ایپ وقتاً فوقتاً اپنے سسٹم میں نئی اپڈیٹس، پرائیویسی فیچرز اور سیکیورٹی نظام بہتر کرتا رہتا ہے جس کے لیے جدید آپریٹنگ سسٹم اور زیادہ طاقتور ڈیوائسز کی ضرورت ہوتی ہے۔ پرانے اینڈرائیڈ ورژنز ان نئی سہولیات کو سپورٹ نہیں کر سکتے۔

یہ بھی پڑھیں: کراچی: انٹر امتحانات کا آغاز

میٹا اب واٹس ایپ میں مصنوعی ذہانت (اے آئی) پر مبنی فیچرز اور جدید ٹولز شامل کر رہی ہے جن کے لیے زیادہ پروسیسنگ پاور اور جدید سافٹ ویئر سپورٹ ضروری ہے۔ اسی وجہ سے پرانے موبائل فونز اب اس ایپ کے نئے فیچرز کے ساتھ مطابقت نہیں رکھتے۔

ماہرین نے ان صارفین کو مشورہ دیا ہے جو اب بھی پرانے اینڈرائیڈ فون استعمال کر رہے ہیں کہ وہ جلد از جلد نیا اسمارٹ فون لے لیں اور اپنی واٹس ایپ چیٹس، تصاویر، ویڈیوز اور بیک اپ نئے ڈیوائس پر منتقل کر لیں۔ خبردار کیا گیا ہے کہ ستمبر 2026 کی آخری تاریخ سے پہلے ڈیٹا منتقل نہ کرنے کی صورت میں مستقل ڈیٹا ضائع ہو سکتا ہے۔

یہ فیصلہ ٹیکنالوجی کمپنیوں کے اس رجحان کا حصہ ہے جس میں وہ پرانے آپریٹنگ سسٹمز کی سپورٹ ختم کر رہی ہیں تاکہ سیکیورٹی، کارکردگی اور جدید اے آئی فیچرز کو بہتر بنایا جا سکے۔