ٹرائی سیریز، پاکستان نے پہلے ون ڈے میں سری لنکا کو شکست دے دی
سری لنکا کی جانب سے رتھنائیکے نے 79 رنز کی نمایاں اننگز کھیلی جبکہ لیاناگے 60 رنز بنا کر آؤٹ ہوئے۔ کوشال مینڈس نے 44 اور داسن شناکا نے 28 رنز بنائے، تاہم ان کی کوششیں ٹیم کو فتح دلانے میں ناکام رہیں۔
اس سے قبل سری لنکا نے ٹاس جیت کر پاکستان کو پہلے بیٹنگ کی دعوت دی۔ قومی ٹیم نے سلمان علی آغا کی شاندار سنچری کی بدولت مقررہ ہدف کے لیے 305 رنز بنائے۔ سلمان علی آغا نے 107 رنز اسکور کیے جبکہ بابر اعظم نے 45، سعد بیگ نے 39 اور حسن نواز نے 37 رنز کی اننگز کھیلی۔ صائم ایوب 7، فخر زمان 16 اور عرفات منہاس 18 رنز بنا سکے۔
سری لنکا کی جانب سے ایشان ملنگا نے 4 جبکہ اسیتھا فرنینڈو نے 3 وکٹیں حاصل کیں۔ میچ کے دوران سری لنکن ٹیم پر سلو اوور ریٹ کی پابندی بھی عائد ہوئی، جس کے باعث آخری دو اوورز میں صرف چار کھلاڑی باؤنڈری پر موجود رہ سکے۔
پاکستانی کپتان شاہین شاہ آفریدی نے ٹاس کے بعد کہا تھا کہ اگر پاکستان ٹاس جیتتا تب بھی پہلے بیٹنگ کا فیصلہ کرتا۔ انہوں نے سعد بیگ کے ون ڈے انٹرنیشنل ڈیبیو کی تصدیق بھی کی۔ دوسری جانب سری لنکن کپتان کوشال مینڈس نے کہا کہ ٹیم تین فاسٹ بولرز اور ایک اسپنر کے ساتھ میدان میں اتری ہے۔
واضح رہے کہ تین ملکی ون ڈے سیریز میں پاکستان اور سری لنکا کے علاوہ انگلینڈ کی ٹیم بھی شریک ہے۔ پاکستان کے شاداب خان اور سفیان مقیم بیماری کے باعث پہلے میچ میں شرکت نہیں کرسکے، جبکہ آئندہ میچز میں ان کی دستیابی کا فیصلہ بعد میں کیا جائے گا۔
