دوسرا ٹی ٹونٹی، پاکستان نے سری لنکا کو ہرا کر سیریز جیت لی
راولپنڈی میں کھیلے گئے میچ میں سری لنکا نے ٹاس جیت کر پہلے بولنگ کا فیصلہ کیا، جس کے بعد پاکستان نے شاندار بیٹنگ کا مظاہرہ کرتے ہوئے مقررہ 20 اوورز میں 3 وکٹوں کے نقصان پر 215 رنز بنائے۔
پاکستان کی جانب سے معاذ صداقت نے دھواں دار بیٹنگ کرتے ہوئے 51 گیندوں پر 96 رنز اسکور کیے۔ ان کی اننگز میں 6 چوکے اور 7 چھکے شامل تھے۔
کپتان صاحبزادہ فرحان نے بھی عمدہ کارکردگی کا مظاہرہ کیا اور 44 گیندوں پر 73 رنز بنائے۔ ان کی اننگز میں 4 چوکے اور 5 چھکے شامل تھے۔ فخر زمان نے 22 جبکہ حسن نواز نے 19 رنز اسکور کیے۔
سری لنکا کی جانب سے ایشان ملنگا، مہیش تھیکشانا اور داسن شناکا نے ایک، ایک وکٹ حاصل کی۔
216 رنز کے ہدف کے تعاقب میں سری لنکن ٹیم مقررہ 20 اوورز میں 7 وکٹوں کے نقصان پر 133 رنز بناسکی، یوں پاکستان نے میچ 82 رنز سے اپنے نام کرلیا۔
یہ بھی پڑھیں: رونالڈو کو کیمپ چھوڑنا مہنگا پڑ گیا، پابندی کا سامنا
سری لنکا کی جانب سے مہیش تھیکشانا 32، چمندو وکرما سنگھے 29، کمیندو مینڈس 23 اور سنتھ جے سوریا 22 رنز بناکر نمایاں رہے۔
پاکستان کی جانب سے عمران رندھاوا نے 3 کھلاڑیوں کو آؤٹ کیا، جبکہ سلمان مرزا نے 2 وکٹیں حاصل کیں۔ صائم ایوب اور ابرار احمد نے ایک، ایک کھلاڑی کو پویلین کی راہ دکھائی۔
اس فتح کے ساتھ پاکستان نے تین میچوں کی ٹی ٹوئنٹی سیریز میں 0-2 کی فیصلہ کن برتری حاصل کرلی ہے۔
