پاکستانی کرکٹ ٹیم کی کنگ چارلس سے ملاقات، کھلاڑیوں کی حوصلہ افزائی
ملاقات کے دوران کنگ چارلس نے پاکستانی کرکٹ ٹیم کے کھلاڑیوں اور ٹیم آفیشلز سے گفتگو کی اور ان کی حوصلہ افزائی کی۔ چیئرمین پاکستان کرکٹ بورڈ (پی سی بی) محسن نقوی بھی اس موقع پر موجود تھے۔
تقریب کے دوران کنگ چارلس نے محسن نقوی سے پاکستان میں کرکٹ کے فروغ کے ساتھ ساتھ انسداد دہشت گردی اور ملک میں امن و امان برقرار رکھنے کی کوششوں پر بھی تبادلہ خیال کیا۔
اس موقع پر برطانوی ہائی کمشنر نے کنگ چارلس سے گفتگو کرتے ہوئے کہا کہ خطے میں امن کے لیے پاکستان اور محسن نقوی نے اہم کردار ادا کیا ہے۔
ملاقات کے بعد میڈیا سے گفتگو کرتے ہوئے محسن نقوی نے کہا کہ کنگ چارلس سے ملاقات انتہائی مفید رہی۔ ان کے مطابق برطانوی بادشاہ نے پاکستانی کھلاڑیوں کی حوصلہ افزائی کی اور امن کے لیے کی جانے والی کوششوں کو سراہا۔
محسن نقوی کا کہنا تھا کہ ملاقات کے دوران کرکٹ سمیت مختلف امور پر مثبت گفتگو ہوئی اور کنگ چارلس نے پاکستان کرکٹ ٹیم کے لیے نیک خواہشات کا اظہار کیا۔
کنگ چارلس سے ملاقات کے بعد وزیر داخلہ اور چیئرمین پی سی بی محسن نقوی برطانیہ کا دورہ مکمل کرکے وطن واپس روانہ ہوگئے۔
پاکستانی کرکٹ ٹیم کی برطانوی شاہی خاندان سے یہ ملاقات دونوں ممالک کے درمیان کھیلوں اور باہمی تعلقات کے حوالے سے بھی اہم پیش رفت قرار دی جارہی ہے۔
