دورۂ انگلینڈ کیلئے پاکستان انڈر 19 سکواڈ کا اعلان
پاکستان انڈر 19 ٹیم دورۂ انگلینڈ کے دوران ایک یوتھ ٹیسٹ اور 4 ون ڈے میچز کھیلے گی۔ قومی جونیئر ٹیم کا انگلینڈ میں مصروف دورہ 2 ستمبر سے 16 ستمبر تک جاری رہے گا، جس کیلئے کھلاڑیوں نے تیاریاں شروع کردی ہیں۔
پاکستان اور انگلینڈ انڈر 19 ٹیموں کے درمیان یوتھ ٹیسٹ میچ 2 سے 5 ستمبر تک کھیلا جائے گا، جبکہ چار میچز پر مشتمل ون ڈے سیریز کا آغاز 9 ستمبر سے ہوگا۔ سیریز کا آخری میچ 16 ستمبر کو کھیلے جانے کا شیڈول ہے۔
اعلان کردہ سکواڈ میں وکٹ کیپر عبدالقادر، آل راؤنڈرز جہانگیر بلال، حیام خان اور علیان سلمان، بلے باز حسنین عباس ڈار جبکہ فاسٹ بولر رضوان اللہ بھی شامل ہیں، جو دورۂ انگلینڈ کے دوران پاکستان انڈر 19 ٹیم کی جانب سے ڈیبیو کرسکتے ہیں۔
دیگر کھلاڑیوں میں عبدالسبحان، احمد حسین، حمزہ ظہور، محمد صیام، محمد حذیفہ، نقاب شفیق، عمر زیب اور عثمان خان شامل ہیں۔
قومی جونیئر ٹیم کے کپتان فرحان یوسف پر دورے کے دوران ٹیم کو بہترین کارکردگی دکھانے کی ذمہ داری ہوگی۔ ٹیم مینجمنٹ کو امید ہے کہ نوجوان کھلاڑی انگلینڈ کی کنڈیشنز میں عمدہ کھیل کا مظاہرہ کرتے ہوئے مستقبل کیلئے اپنی صلاحیتوں کو نکھاریں گے۔
یہ بھی پڑھیں:لارڈز ٹیسٹ سے قبل پاکستان ٹیم میں بڑی تبدیلیوں کا امکان
پاکستان انڈر 19 ٹیم دورۂ انگلینڈ کیلئے اتوار کو لاہور سے روانہ ہوگی، جہاں کھلاڑی اہم سیریز سے قبل تیاریوں اور کنڈیشنز سے ہم آہنگ ہونے پر توجہ دیں گے۔
