فیفا ورلڈ کپ میں بڑا اپ سیٹ، 5 بار کی عالمی چیمپئن برازیل باہر
نیویارک میں کھیلے گئے برازیل اور ناروے کے میچ کا آغاز انتہائی سنسنی خیز انداز میں ہوا، میچ کے چوتھے منٹ میں ہی ناروے کے پیٹرک برگز نے گول اسکور کیا، تاہم آف سائیڈ کے باعث اسے مسترد کر دیا گیا۔
اس کے بعد برازیل کو ایک اہم موقع اس وقت ملا جب انہیں فاؤل پر پنالٹی دی گئی، مگر برونو گومیریس گول کرنے میں ناکام رہے۔
پہلے ہاف میں دونوں ٹیموں نے جارحانہ کھیل پیش کیا، تاہم کوئی بھی ٹیم برتری حاصل نہ کر سکی، ناروے نے دفاعی حکمت عملی کے ساتھ ساتھ بہترین حملے بھی کیے اور حریف پر دباؤ برقرار رکھا، وقفے تک مقابلہ بغیر کسی گول کے برابر رہا۔
دوسرے ہاف میں کھیل کی شدت میں اضافہ ہوا، 79ویں منٹ میں ناروے کے اسٹار اسٹرائیکر ایرلنگ ہالینڈ نے شاندار ہیڈر کے ذریعے گیند کو جال میں پہنچا کر اپنی ٹیم کو برتری دلائی۔ اسی منٹ کے کچھ ہی لمحوں بعد انہوں نے ڈی کے باہر سے ایک زبردست کک لگائی جو برازیل کے دفاعی کھلاڑیوں اور گول کیپر کو چکمہ دیتے ہوئے سیدھی گول میں جا پہنچی، اور اسکور 0-2 ہو گیا۔
انجری ٹائم میں برازیل کو ایک اور پنالٹی ملی جس پر متبادل کھلاڑی کے طور پر آنے والے نیمار نے گول اسکور کیا۔ گول کے بعد نیمار اور ناروے کے گول کیپر کے درمیان گرما گرم بحث بھی دیکھنے میں آئی، تاہم اس کے فوراً بعد ریفری نے میچ ختم کرنے کی وسل بجا دی، یوں برازیل کو ایونٹ سے باہر ہونا پڑا جبکہ ناروے پہلی بار کوارٹر فائنل میں پہنچ گیا۔
یہ بھی پڑھیں:فیفا ورلڈ کپ: لیونل میسی نے نیا ورلڈ ریکارڈ بنا ڈالا
دوسری جانب ایک اور اہم میچ میں انگلینڈ نے میزبان میکسیکو کو سنسنی خیز مقابلے کے بعد 2 کے مقابلے میں 3 گول سے شکست دی۔ انگلینڈ کی جانب سے جوڈ بیلنگھم نے دو شاندار گول کیے جبکہ کپتان ہیری کین نے ایک گول اسکور کیا۔ میکسیکو کی جانب سے نینس اور جمینینس نے گول کیے لیکن ٹیم کو شکست سے نہ بچا سکے۔
اس فتح کے بعد انگلینڈ نے بھی کوارٹر فائنل میں جگہ بنا لی، جہاں اس کا مقابلہ اب ناروے سے ہوگا۔
