تفصیلات کے مطابق 18 سالہ آرزو دختر حیدر علی کوئٹہ میں موٹر سائیکل حادثے کا شکار ہوئیں، حادثہ اس وقت پیش آیا جب وہ اپنی ساتھی کے ہمراہ مقامی کراٹے چیمپئن شپ میں شرکت کیلئے جا رہی تھیں کہ موٹر سائیکل پھسلنے کے باعث وہ شدید زخمی ہو گئیں۔

آرزو کا تعلق غلام علی ہزارہ اسپورٹس کمپلیکس کوئٹہ سے تھا اور وہ قومی سطح پر بلوچستان کی نمائندگی کر رہی تھیں۔ وہ اپنی محنت، لگن اور شاندار کارکردگی کی وجہ سے نوجوان کھلاڑیوں میں ایک نمایاں مقام رکھتی تھیں۔

حادثے کے بعد انہیں فوری طور پر طبی امداد کیلئے قریبی اسپتال منتقل کیا گیا، تاہم وہ زخموں کی تاب نہ لاتے ہوئے چل بسیں، ان کی ناگہانی وفات نے کھیلوں کے حلقوں کو افسردہ کر دیا ہے۔

پاکستان کراٹے فیڈریشن کے چیئرمین محمد جہانگیر سمیت دیگر عہدیداروں نے آرزو کی وفات پر گہرے دکھ اور افسوس کا اظہار کیا ہے۔ انہوں نے سوگوار خاندان سے ہمدردی اور تعزیت کا اظہار کرتے ہوئے کہا کہ آرزو کی خدمات کو ہمیشہ یاد رکھا جائے گا۔

یہ بھی پڑھیں:فتح کی متلاشی راولپنڈیز کو سلطانز سے پھر شکست

کھلاڑیوں اور کھیلوں سے وابستہ افراد نے بھی ان کی وفات کو قومی کھیل کیلئے بڑا نقصان قرار دیا ہے۔