رپورٹس کے مطابق پاکستان کرکٹ بورڈ (پی سی بی) بنگلہ دیش کیخلاف آئندہ سیریز کے شیڈول کے اعلان کے بعد کپتان اور ہیڈ کوچ کی باضابطہ تقرری کا اعلان کرے گا، اس فیصلے کے بعد قومی ٹیم میں ایک نیا انتظامی ڈھانچہ سامنے آئے گا۔
اطلاعات کے مطابق سرفراز احمد، سابق اسسٹنٹ کوچ اظہر محمود کی جگہ ہیڈ کوچ کی ذمہ داریاں سنبھالیں گے، وہ اس وقت قومی سلیکشن کمیٹی کا حصہ بھی ہیں۔
سرفراز احمد کی نگرانی میں لاہور میں نیشنل کرکٹ اکیڈمی میں ریڈ بال کیمپ بھی جاری ہے، جہاں قومی اکیڈمی کے کوچز کھلاڑیوں کی تربیت میں مصروف ہیں۔
دوسری جانب شان مسعود پہلے ہی ٹیسٹ ٹیم کی قیادت کر رہے ہیں اور بورڈ کی پالیسی کے مطابق انہیں مستقل مزاجی کے تحت برقرار رکھا گیا ہے، پاکستان نے آخری ٹیسٹ سیریز جنوبی افریقہ کیخلاف کھیلی تھی جو ایک ایک سے برابر رہی تھی۔
یہ بھی پڑھیں:شاہد آفریدی کا عمران خان کی حمایت میں اہم بیان
پی سی بی حکام کے مطابق پاکستان ٹیم آئندہ بنگلہ دیش، ویسٹ انڈیز اور انگلینڈ کیخلاف تین اہم ٹیسٹ سیریز کھیلے گی، اس وقت وائٹ بال کرکٹ کے ہیڈ کوچ مائیک ہیسن ہیں جبکہ ون ڈے ٹیم کی قیادت شاہین شاہ آفریدی اور ٹی ٹوئنٹی ٹیم کی قیادت سلمان علی آغا کر رہے ہیں۔
