دبئی کرکٹ سٹیڈیم میں کھیلے گئے ایشیا کپ کے فائنل معرکے میں بھارت نے پاکستان کو 5 وکٹوں سے شکست دے کر ٹائٹل اپنے نام کر لیا۔

 ہدف کے تعاقب میں بھارت کی ابتدائی تین وکٹیں 20 رنز پر گر چکی تھیں تاہم تلک ورما نے جارحانہ انداز اپناتے ہوئے نیا کو پار لگایا اور ٹیم کی فتح میں اہم کردار ادا کیا۔

بھارت کی جانب سے تلک ورما نے 53 گیندوں پر69 رنز کی ناقابل شکست اننگ کھیلی، شیوم دوبے نے 33، سنجو سیمسن نے 24 رنز سکور کیے، ابھیشیک شرما 5، شبمن گل 12 اور کپتان سوریا کپتان یادو ایک رن بنا کر آؤٹ ہوئے۔

پاکستان کی جانب سے فہیم اشرف نے تین کھلاڑیوں کو پویلین چلتا کیا جبکہ شاہین آفریدی اور ابرار احمد نے ایک ، ایک وکٹ حاصل کی۔

قبل ازیں ایونٹ کے فائنل میں بھارت کی دعوت پر پہلے کھیلتے ہوئے پاکستان کی پوری ٹیم مقررہ 20 اوورز بھی پورے نہ کھیل سکی اور 19ویں اوور کی پہلی گیند پر پوری ٹیم پویلین لوٹ گئی۔

پاکستان کی جانب سے صاحبزادہ فرحان اور فخر زمان نے اننگ کا آغاز کیا اور 84 رنز کی شراکت قائم کی تاہم صاحبزادہ فرحان 38 گیندوں پر 57 رنز بنا کر پویلین لوٹ گئے، ان کی اننگ میں 3 چھکے اور 5 چوکے شامل تھے۔

پاکستان کا دوسرا نقصان صائم ایوب کی صورت میں ہوا جب وہ 10 گیندوں پر 14 رنز بنا کر کلدیپ یادو کی گیند پر جسپریت بمراہ کو کیچ تھما بیٹھے جبکہ نئے آنے والے بلے باز محمد حارث بغیر کھاتہ کھولے ہی چلتے بنے۔

کریز پر موجود فخر کا ساتھ نبھانے کیلئے کپتان سلمان علی آغا آئے لیکن فخر کی مزاحمت بھی 46 رنز پر دم توڑ گئی، ٹیم کے 126 رنز کے مجموعے پر فخر زمان بھی پویلین لوٹ گئے، پاکستان کا پانچواں نقصان حسین طلعت کی صورت میں ہوا جب وہ صرف ایک رن بنا کر کیچ آؤٹ ہو گئے۔

کپتان سلمان آغا بھی صرف 8 رنز بنا کر ہی چلتے بنے، شاہین آفریدی بھی کھاتہ کھولے بغیر ہی پویلین لوٹ گئے، نئے آنے والے بلے باز فہیم اشرف بھی بغیر کوئی رن بنائے کیچ تھما بیٹھے، حارث رؤف اور محمد نواز بھی 6،6 رنز بنا کر ہی پویلین لوٹ گئے۔

بھارت کی جانب سے کلدیپ یادو نے 4 کھلاڑیوں کو پویلین کی راہ دکھائی جبکہ جسپریت بمراہ، ورون چکراورتھی اور اکشر پٹیل نے 2،2 کھلاڑیوں کو آؤٹ کیا۔