میچ کا آغاز ایک سرد ماحول میں ہوا جہاں دونوں کپتانوں نے ٹاس کے موقع پر خیر سگالی کا روایتی مظاہرہ کرنے سے گریز کیا۔ صورتحال اس وقت مزید سنگین ہوگئی جب میچ کے اختتام پر بھارتی کھلاڑیوں نے پاکستانی ٹیم سے ہاتھ ملانے سے انکار کر دیا، جس نے کھیل کی فضا کو مزید بوجھل بنا دیا۔

پاکستانی ٹیم منیجر نوید اکرم چیمہ نے فوری طور پر میچ ریفری اینڈی پائی کرافٹ کے سامنے باقاعدہ احتجاج درج کروایا اور بھارتی رویے کو ’’کھیل کی روح کے منافی‘‘ قرار دیا۔ انہوں نے یہ بھی انکشاف کیا کہ ٹاس کے وقت کپتانوں کو ہاتھ نہ ملانے کی ہدایت خود میچ ریفری کی طرف سے دی گئی تھی، جسے پاکستان نے جانبداری پر مبنی قرار دیا۔ اس واقعے کے بعد پاکستان کرکٹ بورڈ نے ایشیا کپ کے باقی میچوں سے اینڈی پائی کرافٹ کو ہٹانے کا مطالبہ کر دیا۔

کشیدگی اس وقت اور بڑھ گئی جب بھارتی کپتان سوریہ کمار یادو نے جیت کو ملک کی مسلح افواج کے نام کر دیا۔ ناقدین کے مطابق یہ اقدام آئی سی سی قوانین کی کھلی خلاف ورزی ہے کیونکہ کھیل کو سیاسی رنگ دینا ضابطہ اخلاق کے منافی ہے۔ یادو کے بیان پر سخت ردعمل سامنے آیا اور اسے ایشیا کپ جیسے بڑے ایونٹ کی سیاست زدگی قرار دیا گیا۔

بطور احتجاج، پاکستانی کپتان سلمان علی آغا نے روایت کے برعکس میچ کے بعد ہونے والی پریزنٹیشن تقریب کا بائیکاٹ کیا۔ اس فیصلے کو ٹیم کی ناراضگی اور سنجیدہ تحفظات کا مظہر سمجھا جا رہا ہے۔

یہ بھی پڑھیں: میچ ریفری تبدیل نہ ہوا تو پاکستان ایشیاء کپ میں کوئی میچ نہیں کھیلے گا

ایشین کرکٹ کونسل (ACC) نے تصدیق کی ہے کہ وہ اس تنازعے کے تمام پہلوؤں کا بغور جائزہ لے رہی ہے۔ حتمی فیصلے کا اعلان تاحال نہیں کیا گیا، تاہم ابتدائی اطلاعات کے مطابق بھارتی ٹیم پر جرمانے عائد کیے جانے کے امکانات ہیں۔

یہ تنازعہ نہ صرف ایشیا کپ کے سب سے اہم میچ کو داغدار کر چکا ہے بلکہ کھیل میں سیاست کے بڑھتے ہوئے اثرات پر بھی نئی بحث چھیڑ دی ہے۔ اگر پاکستان اور بھارت کا آمنا سامنا سپر فور مرحلے یا فائنل میں دوبارہ ہوتا ہے تو یہ دیکھنا دلچسپی سے خالی نہ ہوگا کہ اے سی سی کھیل کو علاقائی سیاست سے الگ رکھنے کے لیے کس قسم کے اقدامات کرتا ہے۔