کرکٹر احمد شہزاد اپنی ٹیم کے ہمراہ مظفرگڑھ کے علاقے رنگپور پہنچے جہاں انہوں نے سیلاب متاثرین کی امدادی سرگرمیوں حصہ لیا، قومی کرکٹر احمد شہزاد نے سیلاب متاثرین میں امدادی سامان بھی تقسیم کیا۔
احمد شہزاد سیلاب متاثرہ ایک بزرگ خاتون سے ملتے ہوئے جذباتی ہوگئے، بزرگ خاتون سے گفتگو کرتے ہوئے احمد شہزاد نے کہا پریشان نہیں ہونا، یہ مشکل وقت ضرور ہے لیکن گزر جائے گا۔
علاوہ ازیں انہوں نے جھنگ میں بھی سیلاب سے متاثر ہونے والے مختلف علاقوں کا دورہ کیا اور متاثرین میں راشن تقسیم کیا، احمد شہزاد فاؤنڈیشن کی جانب سے سیلاب متاثرین کے ساتھ ساتھ جانوروں کو بھی خوراک مہیا کی گئی۔
یہ بھی پڑھیں: دریائے چناب کا بند ٹوٹ گیا، پانی آبادیوں میں داخل
قومی کرکٹر نے اپنے سوشل میڈیا اکاؤنٹس پر شیئر کی گئی مختلف ویڈیوز میں بتایا کہ پنجاب کے مختلف اضلاع میں سیلاب سے بڑی تباہی ہوئی، سیلاب متاثرین کو راشن کی ضرورت ہے، ہم کوشش کررہے ہیں سیلاب متاثرین کو راشن پہنچایا جائے۔
انہوں نے سوشل میڈیا کے ذریعے عوام سے اپیل کی کہ سیلاب متاثرین کی مدد کے لیے احمد شہزاد فاؤنڈیشن میں اپنے عطیات بھجوائیں تاکہ ضرورت مندوں کو ان کا حق مل سکے۔
احمد شہزاد کا مزید کہنا تھا کہ ہمارے پاس جو بھی عطیات آرہے ہیں ہماری پوری کوشش ہے وہ سیلاب متاثرین پر ایمانداری کے ساتھ خرچ کریں۔
