وزیراعظم محمد شہباز شریف کی زیر صدارت وفاقی کابینہ کا اجلاس ہوا جس میں وزیرِ اعظم نے ملک بھر میں رواں برس مون سون اور سیلابی صورتحال کے پیش نظر ماحولیاتی اور زرعی ایمرجنسی کے نفاذ کی اصولی منظوری کا اعلان کردیا۔

کابینہ اجلاس کے اعلامیہ کے مطابق وزیرِ اعظم چاروں صوبوں کے وزرائے اعلیٰ اور متعلقہ حکام پر مشتمل اجلاس کی جلد صدارت کریں گے جس میں موسمیاتی تبدیلی کے مضر اثرات سے مزید نقصانات میں کمی کے حوالے سے مستقبل کے لائحہ عمل پر مشاورت ہو گی۔

اعلامیہ میں بتایا گیا کہ وفاقی کابینہ کو ملک میں سیلاب کی موجودہ صورتحال اور نقصانات پر بریفنگ دی گئی، سیر حاصل مشاورت کے بعد ایمرجنسی کی اصولی منظوری کا فیصلہ کیا گیا۔

کابینہ ارکان نے ملک میں لاکھوں ایکڑ زرعی اراضی اور فصلوں کے نقصانات پر روشنی ڈالی اور انفراسٹرکچر کی بحالی و زراعت میں ہونے والے نقصانات کے ازالے اور کسانوں کی معاونت کے حوالے سے بھی تجاویز دیں۔

یہ بھی پڑھیں: وزیراعلیٰ مریم نواز کا سیلاب متاثرین کیلئے امدادی پیکیج کا اعلان

وفاقی کابینہ نے سماجی رابطوں کی ویب سائٹس پر شہداء اور افواجِ پاکستان کے مخالف تضحیک آمیز مواد و بیان نشر کرنے کی بھرپور الفاظ میں مذمت کی، ارکان نے پاکستان کی سرحدوں کی حفاظت میں دن رات مصروف عمل افواج پاکستان کے افسران و جوانوں ، ملک میں امن کے قیام کیلئے عظیم قربانیاں دینے والے شہداء اور ان کے اہل خانہ کو خراج تحسین پیش کیا۔

وزیراعظم شہباز شریف نے شر پسند عناصر کے سد باب کیلئے سخت ایکشن لینے کی ہدایت کرتے ہوئے کہا کہ ایسے عناصر کی ہر فورم پر حوصلہ شکنی اور ان کی تضحیک آمیز مہم کا جواب ہم سب کی قومی ذمہ داری ہے، پاکستانی قوم اپنے شہدا اور ان کے اہل خانہ کی عظیم قربانیوں کو کبھی فراموش نہیں کر سکتی، مجھ سمیت پوری قوم کو اپنے شہداء اور ان کے اہل خانہ پر فخر ہے۔

اعلامیہ کے مطابق وفاقی کابینہ نے بنوں آپریشن میں عظیم قربانی دینے والے میجر عدنان اسلم شہید کیلئے بلندی درجات کی دعا کی، وفاقی کابینہ نے وفاقی وزیرِ سمندری امور جنید انور چودھری کی والدہ مرحومہ ، وزیرِ مملکت غذائی تحفظ ملک رشید احمد خان کے بڑے بھائی حاجی حنیف خان مرحوم اور سابق چیئرمین سینیٹ صادق سنجرانی کے والد مرحوم آصف سنجرانی کیلئے بھی دعائے مغفرت کی۔

وزیر اعظم نے گزشتہ روز دوحہ میں اسرائیلی فورسز کی طرف سے غیر قانونی اور گھناؤنی بمباری کی شدید مذمت کی ، وزیرِ اعظم نے گہری ہمدردی کا اظہار کرتے ہوئے امیرِ قطر، قطری شاہی خاندان اور قطر کے عوام کے ساتھ یکجہتی کا اظہار کیا۔

 نئے گیس کنکشن پر پابندی ختم کرنے کا فیصلہ

وفاقی کابینہ نے وزارت پٹرولیم کی سفارش پر گیس کنکشنز کے منتظر صارفین کو آر ایل این جی کنکشنز کی فراہمی کی بھی منظوری دے دی، منظوری کے بعد سوئی سدرن اور سوئی نادرن گیس کمپنیاں کنکشنز کی فراہمی کا عمل شروع کریں گی۔

حکام کی جانب سے کابینہ ارکان کو بتایا گیا کہ ان کنکشنز کے ذریعے ملنے والی آر ایل این جی پر صارفین کی ایل پی جی سے 30 فیصد کم لاگت آئے گی۔

اعلامیہ کے مطابق وفاقی کابینہ نے وزارت ریلوے کی سفارش پر ازبکستان، افغانستان اور پاکستان کے مابین مشترکہ فزیبلٹی اسٹڈی پر سہ فریقی حکومتی فریم ورک معاہدے کی بعد از وقوع توثیق کی، اس معاہدے پر دستخط گزشتہ ماہ ہوئے تھے اور یہ علاقائی تجارت و رابطہ کاری کے لیے ایک اہم منصوبہ ہے، کابینہ کی توثیق اس اسٹرٹیجک منصوبے کی تکمیل کیلئے حکومتی عزم کا اعادہ ہے۔

اعلامیہ میں مزید بتایا گیا کہ وفاقی کابینہ نے کابینہ کی اقتصادی رابطہ کمیٹی (ای سی سی)، بین الحکومتی تجارتی لین دین (سی سی او آئی جی سی ٹی) اور قانون سازی کیسز (سی سی ایل سی) سے متعلق کابینہ کمیٹیوں کے فیصلوں کی بھی توثیق کی۔