آئی سی سی کے اینٹی کرپشن ٹربیونل کا اجلاس ہوا جس میں سری لنکا کے سابق ڈومیسٹک کرکٹر سالیا سمن کو امارات کرکٹ بورڈ (ای سی بی) کے اینٹی کرپشن کوڈ کی خلاف ورزی کا مرتکب پائے جانے پر سزا سنائی گئی۔

خیال رہے کہ سالیا سمن ان آٹھ افراد میں شامل تھے جن کو ستمبر 2023 میں اینٹی کرپشن قوانین کی خلاف ورزی پر مورد الزام ٹھہرایا گیا تھا۔

یہ بھی پڑھیں: پی سی بی کے چیف کیوریٹر ٹونی ہیمنگ نے استعفیٰ دے دیا

سری لنکن کرکٹر پر یہ الزامات 2021 میں ہونے والی ابو ظہبی ٹی 10 کرکٹ لیگ اور اس دوران میچ فکسنگ کی کوششوں سے متعلق تھے، جنہیں انٹرنیشنل کرکٹ کونسل (آئی سی سی) اور اماراتی کرکٹ بورڈ (ای سی بی )کے اینٹی کرپشن آفیشل کی جانب سے ناکام بنایا گیا تھا۔

آئی سی سی کے اینٹی کرپشن ٹربیونل میں مکمل سماعت کے بعد تحریری اور زبانی دلائل پیش کیے گئے، دلائل کی روشنی میں آئی سی سی اینٹی کرپشن ٹربیونل نے سابق سری لنکن ڈومیسٹک کرکٹر سالیا سمن کو قصوروار قرار دے کر پانچ برس کی پابندی عائد کر دی۔