نادرا کی جانب سے جاری کردہ ایک سوشل میڈیا پوسٹ میں بتایا گیا کہ جلد ہی پاک آئی ڈی موبائل ایپ میں نادرا سروس سینٹرز پر اپوائنٹمنٹ بکنگ کی سہولت شامل کی جا رہی ہے۔ اس اقدام کا مقصد نادرا دفاتر میں رش کو کم کرنا اور شہریوں کو بروقت اور آرام دہ خدمات فراہم کرنا ہے۔

رپورٹس کے مطابق پہلے مرحلے میں ملک بھر کے 43 منتخب نادرا رجسٹریشن سینٹرز پر یہ اپوائنٹمنٹ سسٹم فعال کیا جائے گا۔ اس کے بعد بتدریج مزید سینٹرز کو بھی اس سسٹم میں شامل کیا جائے گا۔

نادرا کے مطابق چاہے آپ پاکستان میں ہوں یا بیرون ملک، پاک آئی ڈی موبائل ایپ کے ذریعے نہ صرف اپوائنٹمنٹ لی جا سکے گی بلکہ شناختی دستاویزات کیلئے فیس کی ادائیگی بھی آسانی سے کی جا سکے گی۔

یہ بھی پڑھیں:بے نظیر انکم سپورٹ پروگرام کے حوالے سے اہم خبر

اس جدید فیچر کی بدولت شہری لمبی قطاروں سے بچ سکیں گے اور وقت کی بچت ممکن ہوگی۔ نادرا کا یہ اقدام ڈیجیٹل پاکستان کی جانب ایک اور مثبت پیش رفت تصور کیا جا رہا ہے، جس سے لاکھوں شہری مستفید ہو سکیں گے۔

نادرا حکام کا کہنا ہے کہ یہ سہولت جلد ہی عوام کیلئے دستیاب ہو گی،جس کی نادرا کی ویب سائٹ و سوشل میڈیا پلیٹ فارمز کے ذریعے مزید تفصیلات بھی فراہم کی جائیں گی۔