تفصیلات کے مطابق کیرون پولارڈ ٹی 20 فارمیٹ میں 700 میچز کھیلنے والے دنیا کے پہلے کرکٹر بن گئے ہیں، انہوں نے یہ سنگ میل امریکا میں جاری میجر لیگ کرکٹ (MLC) میں ایم آئی نیویارک کی نمائندگی کرتے ہوئے عبور کیا۔
37 سالہ پولارڈ نے اس تاریخی میچ میں سان فرانسسکو الیون کیخلاف 16 گیندوں پر جارحانہ انداز میں 34 رنز بنائے اور 2 وکٹیں بھی حاصل کیں۔ تاہم ان کی شاندار کارکردگی ٹیم کو فتح دلانے میں ناکام رہی، کیونکہ ایم آئی نیویارک 246 رنز کے بڑے ہدف کا تعاقب کرتے ہوئے 47 رنز سے شکست کھا گئی۔
یہ بھی پڑھیں:پاکستان اور بنگلادیش کی ٹی20 سیریز کا شیڈول جاری
کیرون پولارڈ کا یہ ریکارڈ اس بات کا عکاس ہے کہ وہ ٹی20 کرکٹ میں کس قدر پائے کا کھلاڑی ہیں۔ کئی لیگوں اور ٹیموں کی نمائندگی کرتے ہوئے انہوں نے اس فارمیٹ کو نیا انداز دیا ہے۔ ٹی20 میں لمبے چھکے مارنے، برق رفتار بیٹنگ اور میچ بدل دینے والی بولنگ کی صلاحیت نے انہیں عالمی کرکٹ کا حصہ بنایا۔
واضح رہے کہ اپنے کیریئر میں انہوں نے کئی ٹیموں اور فرنچائزز کی طرف سے میدان میں قدم رکھا، جیسے ویسٹ انڈین ٹیم، آئی پی ایل، سی پی ایل اور دیگر لیگ میں انہوں نے اپنی صلاحیتوں کا لوہا منوایا۔
