پاکستان کو علم تھا کہ اگر وہ یہ میچ جیت جاتا تو سیمی فائنل میں اس کی جگہ یقینی ہو جاتی، مگر ان کا سامنا نیوزی لینڈ کی ایسی ٹیم سے تھا جو گروپ مرحلے میں اب تک ناقابل شکست رہی تھی اور اپنے تمام پچھلے میچوں میں مکمل پوائنٹس بھی حاصل کر چکی تھی۔

یاد رہے کہ میچ کا آغاز انتہائی تیز رفتاری سے ہوا اور ساتویں منٹ میں نیوزی لینڈ نے پنالٹی کارنر حاصل کر کے پہلا گول کر دیا۔ نک ووڈز کی شاندار ڈریگ فلک پاکستانی دفاع کو چیرتی ہوئی بائیں جانب سے گول پوسٹ کے اندر چلی گئی۔

ابتدائی نقصان کے بعد پاکستان نے بھرپور ردعمل دیا۔ پہلے کوارٹر کے آخری لمحات میں عبدالرحمٰن نے زبردست ڈریگ فلک کے ذریعے اسکور برابر کر دیا۔ صرف ایک منٹ بعد ہی انہوں نے ایک اور گول کر دیا، جس سے پاکستان کو 1-2 کی برتری حاصل ہو گئی۔

واضح رہے کہ دوسرے کوارٹر میں بھی پاکستان کی برتری قائم رہی۔ وقفے سے کچھ دیر قبل رانا وحید اشرف نے بھی ایک خوبصورت موو کے ذریعے گیند کو گول لائن کے پار پہنچا کر اسکور 1-3 کر دیا۔ اس موقع پر ایسا محسوس ہو رہا تھا کہ پاکستان ایک یادگار فتح حاصل کر کے سیمی فائنل میں باآسانی پہنچ جائے گا۔

لیکن دوسرے ہاف میں مکمل طور پر نیوزی لینڈ کا غلبہ رہا، خاص طور پر ان کے ماہر ڈریگ فلکر، اسکاٹ کوسلٹ، کا۔ بلیک اسٹکس نے لگاتار چھ پنالٹی کارنرز حاصل کیے اور پاکستانی دفاع پر مسلسل دباؤ ڈالے رکھا۔ کوسلٹ نے دو مرتبہ نیچے بائیں کونے کو نشانہ بنا کر اسکور برابر کر دیا۔

یہ بھی پڑھیں:مشفیق الرحیم نے یونس خان کا ٹیسٹ ریکارڈ توڑ دیا

آخری کوارٹر میں بھی نیوزی لینڈ کا دباؤ جاری رہا اور کوسلٹ نے ایک اور شاندار ڈریگ فلک کے ذریعے ہیٹ ٹرک مکمل کی، جس سے نیوزی لینڈ نے زبردست انداز میں کم بیک کرتے ہوئے میچ 3-4 سے جیت لیا۔

میچ کے بعد کوسلٹ نے کہا: ہم نے پورے ٹورنامنٹ میں بھرپور اعتماد کا مظاہرہ کیا ہے۔ ہم سست آغاز کرتے ہیں مگر اپنے عمل پر یقین رکھتے ہیں۔ لڑکوں کو داد دیتا ہوں کہ انہوں نے ایک بار پھر میچ پلٹ دیا۔

ادھر پاکستان کو سیمی فائنل تک رسائی کے لیے ملائیشیا اور جاپان کے درمیان آخری پول  بی  میچ کے نتیجے کا انتظار کرنا پڑا۔ حساب بالکل سادہ تھا: اگر ملائیشیا جاپان کو دو یا اس سے زیادہ گولز سے ہرا دیتا تو پاکستان ایونٹ سے باہر ہو جاتا۔ مگر قسمت نے پاکستان کا ساتھ دیا، اور جاپان نے 1-2 سے فتح حاصل کر کے پاکستان کو سیمی فائنل میں پہنچا دیا۔

اگرچہ پاکستان کو نیوزی لینڈ سے شکست ہوئی، لیکن جاپان کے خلاف فتح اور میزبان ملائیشیا کے ساتھ سخت مقابلے کے بعد حاصل کردہ ڈرا نے پول میں دوسری پوزیشن دلوائی اور سیمی فائنل میں رسائی ممکن بنا دی۔

سیمی فائنل 20 جون کو کھیلے جائیں گے، جبکہ فائنل اور تیسری پوزیشن کے میچز 21 جون کو ہوں گے۔ یہ ٹورنامنٹ اس لحاظ سے بھی اہمیت رکھتا ہے کہ اس کا فاتح 2025–26 کے ایف آئی ایچ ہاکی پرو لیگ کے لیے کوالیفائی کرے گا۔