یہ کارنامہ انہوں نے سری لنکا کے شہر گال میں جاری پہلے ٹیسٹ میچ کے دوران انجام دیا۔
مشفیق الرحیم نے سری لنکا کیخلاف گال انٹرنیشنل اسٹیڈیم میں اپنی 12ویں ٹیسٹ سنچری اسکور کی، جس کے ساتھ ہی وہ سری لنکا کی سرزمین پر بطور اوپنر کے علاوہ ٹیسٹ سنچری بنانے والے سب سے عمر رسیدہ کھلاڑی بن گئے۔
یاد رہے کہ اس سے قبل یہ اعزاز پاکستان کے عظیم بیٹر یونس خان کے پاس تھا، جنہوں نے 2015 میں 37 سال اور 216 دن کی عمر میں سری لنکا میں سنچری بنائی تھی۔ مشفیق الرحیم نے یہ ریکارڈ 38 سال اور 39 دن کی عمر میں توڑ کر ایک نئی تاریخ رقم کر دی۔
یہ بھی پڑھیں:شکیب الحسن پر بنگلادیش چھوڑنے پر پابندی عائد
واضح رہے کہ گال ٹیسٹ کے دوسرے دن کے اختتام پر بنگلادیش نے 9 وکٹوں کے نقصان پر 484 رنز بنائے۔ مشفیق الرحیم نے شاندار 163 رنز کی اننگز کھیلی، جبکہ کپتان نجم الحسین نے 148 رنز اور لٹن داس نے 90 رنز کی عمدہ اننگز کھیلی۔
کرکٹ ماہرین کے مطابق مشفیق الرحیم کا یہ کارنامہ نہ صرف بنگلادیشی ٹیم کیلئے فخر کا باعث ہے بلکہ نوجوان کھلاڑیوں کیلئے ایک مثال بھی ہے کہ عمر صرف ایک نمبر ہے، کارکردگی اور جذبہ اصل کامیابی کی کنجی ہیں۔
مشفیق الرحیم کی اس شاندار اننگز نے نہ صرف ٹیم کو مضبوط پوزیشن میں پہنچایا بلکہ ان کی بین الاقوامی شہرت میں بھی مزید اضافہ کر دیا۔
