وزیراعظم ہاؤس اسلام آباد میں وزیراعظم شہباز شریف سے ہنگو سے تعلق رکھنے والے فٹ بالر محمد ریاض نے ملاقات کی، وزیراعظم نے فٹبالر ریاض حسین کے ہمت و حوصلے کی پذیرائی کی اور انہوں 25 لاکھ روپے کا چیک دیا۔

محمد شہباز شریف نے فٹبالرمحمد ریاض کو کھیل جاری رکھنے اور پاکستان میں فٹبال کے فروغ کے لیے فعال کردار ادا کرنے کی تلقین کی۔

ملاقات کے دوران گفتگو کرتے ہوئے وزیراعظم شہباز شریف کا کہنا تھا کہ پاکستانی نوجوان ملک کا قیمتی اثاثہ ہیں، قومی کھلاڑیوں کو ہر قسم کی سہولیات اور وسائل کی فراہمی حکومت کی اولین ترجیح ہے۔

وزیراعظم نے قومی کھلاڑی محمد ریاض کو مخاطب کرتےہوئے کہا کہ آپ قوم کے ہونہار کھلاڑی ہیں اور آپ کا ٹیلنٹ ضائع نہیں ہونے دینگے۔

وزیراعظم نے حکام کو ہدایت کی کہ محمد ریاض کو ان کی پسند کے وفاقی ادارے میں ملازمت دی جائے، ملک کے مایہ ناز کھلاڑیوں کو ان کی صلاحیتوں کے مطابق سرکاری اداروں میں ملازمتیں دی جائیں، ملک میں کھیلوں کے فروغ کے لیےاقدامات تیز کیے جائیں۔

شہباز شریف کا مزید کہنا تھا کہ عالمی سطح پر پاکستان کی نمائندگی کرنیوالے کھلاڑیوں کی بہبود اور انہیں روزگار کے پائیدار مواقع فراہم کرنے کیلئے حکمت عملی بنائی جائے، نوجوان کھیلوں اور دیگر صحت مند سرگرمیوں میں بڑھ چڑھ کر حصہ لیں۔

فٹبالر محمد ریاض نے وزیراعظم کی جانب سے مالی تعاون اور کھلاڑیوں کی فلاح و بہبود اور کھیلوں کی ترویج کیلئے اقدامات پر وزیراعظم شہباز شریف کا شکریہ ادا کیا۔

خیال رہے کہ گزشتہ دنوں فٹبالر محمد ریاض کی ایک ویڈیو سوشل میڈیا پر وائرل ہوئی تھی جس میں دیکھا گیا تھا کہ قومی فٹبالر محمد ریاض مالی حالات سے تنگ آکر جلیبیاں بیچنے پر مجبور ہیں بعدازاں اس حوالے سے خبر قومی نیوز چینلز پر بھی چلی تھی جس پر وزیراعظم شہباز شریف نے نوٹس لیکر انہیں ملاقات کیلئے مدعو کیا تھا۔