میڈیا رپورٹس کے مطابق بی سی سی آئی کا اصول یہ ہے کہ بین الاقوامی دوروں کے حوالے سے ہر فیصلہ حکومت کی اجازت سے ہوتا ہے۔ راجیو شکلا کا کہنا ہے کہ اس وقت تک پاکستان جانے کے حوالے سے کوئی فیصلہ نہیں ہوا، تاہم حکومت کی ہدایات کے مطابق فیصلہ لیا جائے گا۔

 

 

راجیو شکلا کے مطابق بھارتی کرکٹ بورڈ ہمیشہ اپنے بین الاقوامی دوروں کے لیے حکومت کی مشاورت پر عمل کرتا ہے، اور چیمپیئنز ٹرافی کے معاملے میں بھی یہی پالیسی اختیار کی جائے گی۔ ان کا کہنا تھا کہ آئی سی سی کی طرف سے بی سی سی آئی کو کوئی ڈیڈ لائن نہیں دی گئی، اور حکومت کے فیصلے کے بعد ہی ٹیم کی پاکستان روانگی پر کوئی حتمی قدم اٹھایا جائے گا۔

 

 

بھارت اور پاکستان کے درمیان دو طرفہ کرکٹ تعلقات 2008 ء کے ممبئی حملوں کے بعد سے تعطل کا شکار ہیں۔ اس کے بعد سے دونوں ممالک کی ٹیمیں صرف آئی سی سی کے ٹورنامنٹس میں ایک دوسرے کے خلاف میدان میں اتری ہیں۔ پاکستان نے گزشتہ سال ورلڈ کپ میں شرکت کے لیے بھارت کا سفر کیا تھا، تاہم بھارت نے دو طرفہ کرکٹ کے لیے پاکستان کا دورہ نہیں کیا۔

 

 

راجیو شکلا نے مزید بتایا کہ نومبر کے آخر میں آئی پی ایل کی نیلامی کا انعقاد ہوگا، لیکن نیلامی کے مقام کا حتمی فیصلہ ابھی باقی ہے۔ ان کا کہنا تھا کہ نیلامی کا انعقاد ملک کے اندر یا بیرون ملک ہو سکتا ہے اور مختلف اختیارات پر غور کیا جا رہا ہے۔

 

 

راجیو شکلا نے گرین پارک، کانپور میں ناقص نکاسی آب کی وجہ سے ہونے والی تنقید کا بھی ذکر کیا۔ ان کا کہنا تھا کہ بی سی سی آئی کی روٹیشن پالیسی کے تحت گرین پارک مستقبل میں بھی بین الاقوامی میچوں کی میزبانی کرتا رہے گا، حالانکہ بنگلا دیش کے خلاف حالیہ ٹیسٹ میچ میں بارش کی وجہ سے دو دن کا کھیل ضائع ہو گیا تھا۔