بجلی فی یونٹ 2 روپے 88 پیسے مہنگا کرنے کی درخواست دائر
تفصیلات کے مطابق سینٹرل پاور پرچیزنگ ایجنسی (سی پی پی اے) نے اکتوبر کی ماہانہ فیول پرائس ایڈجسٹمنٹ کی مد میں بجلی مہنگی کرنے کیلئے نیشنل الیکٹرک پاور ریگولیٹری اتھارٹی (نیپرا) سے رجوع کرلیا ہے۔
نیپرا نے سی پی پی اے کی درخواست پر سماعت 26 نومبر کو مقرر کردی، جس میں بجلی کی قیمتوں میں مجوزہ اضافے کا جائزہ لیا جائے گا۔
درخواست میں مؤقف اختیار کیا گیا کہ اکتوبر کے دوران بجلی کی پیداوار پر آنے والی لاگت کے تناظر میں فیول پرائس ایڈجسٹمنٹ کی مد میں فی یونٹ 2 روپے 88 پیسے اضافے کی اجازت دی جائے۔
اگر نیپرا سماعت کے بعد اس اضافے کی منظوری دے دیتا ہے تو صارفین سے آئندہ ماہ بجلی کے بلوں میں اضافی رقم وصول کی جائے گی۔
درخواست کے مطابق مجوزہ اضافہ اکتوبر کے دوران استعمال کیے گئے بجلی کے یونٹس پر لاگو ہوگا، جس کے باعث صارفین کو اپنے استعمال شدہ یونٹس کے حساب سے اضافی ادائیگیاں کرنا پڑیں گی۔
یہ بھی پڑھیں:طیاروں کے ایندھن، مٹی کے تیل کی قیمت میں بھی کمی
واضح رہے کہ فیول پرائس ایڈجسٹمنٹ کے تحت بجلی کی قیمتوں میں ہونے والی تبدیلی کا بوجھ صارفین کو ماہانہ بلوں کے ذریعے منتقل کیا جاتا ہے، تاہم حتمی فیصلہ نیپرا کی سماعت کے بعد سامنے آئے گا۔