پنجاب میں نمبر پلیٹس چھپانے والوں کیلئے بُری خبر
پنجاب سیف سٹیز اتھارٹی نے نمبر پلیٹس چھپانے والی گاڑیوں اور موٹر سائیکلوں کی تصاویر بھی جاری کردی ہیں تاکہ شہریوں کو ٹریفک قوانین کی خلاف ورزیوں سے متعلق آگاہی فراہم کی جاسکے۔
ترجمان سیف سٹیز کے مطابق متعدد گاڑیوں اور موٹر سائیکلوں کی نمبر پلیٹس ہاتھ، کپڑے، ٹیپ اور دیگر اشیاء کے ذریعے چھپانے کی خلاف ورزیاں جدید سیف سٹی کیمروں میں ریکارڈ کی گئی ہیں۔
ترجمان کا کہنا ہے کہ نمبر پلیٹس چھپانے کے باوجود جدید مصنوعی ذہانت (اے آئی) ٹیکنالوجی کی مدد سے گاڑیوں اور موٹر سائیکلوں کی نشاندہی ممکن ہے، اس لیے کیمروں کو دھوکا دینے والے قانون کی گرفت سے نہیں بچ سکیں گے۔
اتھارٹی کے مطابق نمبر پلیٹ چھپانے والوں کو کسی قسم کی رعایت نہیں دی جائے گی، جبکہ سیف سٹی کیمروں کے ذریعے ٹریفک خلاف ورزیوں کی مسلسل نگرانی کی جارہی ہے اور قانونی کارروائی کیلئے متعلقہ پولیس کو الرٹس بھی فراہم کیے جارہے ہیں۔
ترجمان نے واضح کیا کہ نمبر پلیٹ چھپانا صرف ٹریفک قوانین کی خلاف ورزی نہیں بلکہ قانون سے بچنے کی دانستہ کوشش بھی ہے، ایسی خلاف ورزیاں سنگین حادثات اور قیمتی انسانی جانوں کے ضیاع کا سبب بن سکتی ہیں۔
یہ بھی پڑھیں:ترکیہ میں فوجی ہیلی کاپٹر حادثے کا شکار، 4 اہلکار جاں بحق
سیف سٹیز اتھارٹی نے شہریوں سے اپیل کی ہے کہ وہ ٹریفک قوانین کی پابندی کریں اور اپنی گاڑیوں و موٹر سائیکلوں کی نمبر پلیٹس واضح اور درست حالت میں رکھیں تاکہ قانونی کارروائی سے بچ سکیں۔
