ترکیہ میں فوجی ہیلی کاپٹر حادثے کا شکار، 4 اہلکار جاں بحق
ترکیہ کی وزارت دفاع کے مطابق یہ افسوسناک واقعہ مشرقی صوبے مالاتیا میں پیش آیا، جہاں فوج کا ایس 70 (S-70) ہیلی کاپٹر اچانک گر کر تباہ ہوگیا، حادثے کے نتیجے میں ہیلی کاپٹر میں سوار چار فوجی اہلکار جان کی بازی ہار گئے۔
وزارت دفاع کی جانب سے جاری بیان میں بتایا گیا ہے کہ حادثے کی وجوہات تاحال معلوم نہیں ہوسکیں اور واقعے کی تحقیقات کی جارہی ہیں، ابتدائی طور پر ہیلی کاپٹر کے تباہ ہونے کی کوئی حتمی وجہ سامنے نہیں آئی۔
حادثے کے بعد مقامی نشریاتی اداروں نے جائے وقوعہ کی فوٹیج بھی نشر کی، جس میں ایمبولینسوں، پولیس اور فائر بریگیڈ کی گاڑیوں کو دیکھا جاسکتا ہے۔ فوٹیج میں تباہ شدہ ہیلی کاپٹر کے ملبے سے دھواں اور شعلے بلند ہوتے بھی دکھائی دیے۔
واقعے کے بعد امدادی ٹیموں اور متعلقہ اداروں نے علاقے میں کارروائیاں انجام دیں جبکہ حکام حادثے کی تفصیلات جمع کرنے میں مصروف ہیں۔
ترکیہ کی وزارت دفاع نے حادثے میں جاں بحق ہونے والے فوجیوں کے اہل خانہ سے دلی تعزیت اور ہمدردی کا اظہار کیا ہے۔ وزارت نے اپنے بیان میں شہید اہلکاروں کیلئے مغفرت اور بلندی درجات کی دعا بھی کی۔
یہ بھی پڑھیں:شارجہ میں شادی کرنیوالوں کیلئے 30 ہزار درہم گرانٹ کا اعلان
حکام کا کہنا ہے کہ حادثے کی وجوہات جاننے کیلئے تحقیقات مکمل ہونے کے بعد مزید تفصیلات سامنے آنے کی توقع ہے۔
