راولپنڈی میں جعفر ایکسپریس کو حادثے کا شکار
واقعے کے بعد ریلوے حکام اور متعلقہ افسران موقع پر پہنچ گئے جبکہ متاثرہ ریلوے ٹریک کی بحالی کا کام شروع کردیا گیا۔
ریلوے حکام کے مطابق جعفر ایکسپریس پشاور سے کوئٹہ جارہی تھی کہ راولپنڈی کے آئی جے پی روڈ پر واقع نور اسٹیشن کے قریب اس کی ایک بوگی پٹڑی سے اتر گئی۔ حکام کا کہنا ہے کہ ٹرین کا آخری پاور پلانٹ والا حصہ پٹڑی سے اترا ہے، جبکہ کنٹرول روم سے بھی صورتحال کی نگرانی کی جارہی ہے۔
ریلوے حکام کے مطابق متاثرہ ٹریک کو جلد بحال کرنے کیلئے ضروری اقدامات کیے جارہے ہیں۔ دوسری جانب بلوچستان میں مرمتی کاموں کے باعث ٹرین آپریشن بھی متاثر ہوا ہے۔
حکام نے بتایا کہ آج کوئٹہ سے پشاور جانے والی جعفر ایکسپریس منسوخ کردی گئی ہے، جبکہ پشاور سے کوئٹہ آنے والی جعفر ایکسپریس کو جیکب آباد تک محدود کردیا گیا ہے۔
اس کے علاوہ سریاب اور کچلاک کے درمیان چلنے والی جناح پیپلز ٹرین سروس بھی معطل کردی گئی ہے۔
یہ بھی پڑھیں:عمران خان کا پمز ہسپتال میں طبی معائنہ
ریلوے حکام کا کہنا ہے کہ منسوخ ہونے والی ٹرینوں کے مسافروں کو ٹکٹوں کی رقم واپس کردی جائے گی۔ ٹرینوں کی منسوخی اور روٹس محدود ہونے کے باعث مسافروں کو شدید مشکلات کا سامنا کرنا پڑ رہا ہے۔
