بجلی مہنگی کرنے کیلئے نیپرا میں درخواست جمع
بجلی کی تقسیم کار کمپنیوں نے رواں سال کی تیسری سہ ماہی ایڈجسٹمنٹ کی مد میں صارفین سے اربوں روپے وصول کرنے کیلئے نیشنل الیکٹرک پاور ریگولیٹری اتھارٹی (نیپرا) میں درخواست جمع کرا دی ہے۔
درخواست کے مطابق بجلی صارفین سے مجموعی طور پر 23 ارب 33 کروڑ روپے وصول کرنے کی تجویز دی گئی ہے۔ اس سلسلے میں جولائی سے ستمبر 2026 کی سہ ماہی ایڈجسٹمنٹ کے تحت بجلی کے نرخوں میں اضافے کی درخواست دائر کی گئی ہے۔
درخواست میں کیپیسٹی چارجز کی مد میں 38 ارب 92 کروڑ روپے وصول کرنے کی اجازت مانگی گئی ہے، جبکہ آپریشنز اینڈ مینٹیننس اخراجات کی مد میں 5 ارب 59 کروڑ 70 لاکھ روپے اضافے کی درخواست کی گئی ہے۔
دوسری جانب انکریمنٹل کنزمپشن پیکج کے اثرات کی مد میں 29 ارب 25 کروڑ روپے کمی کی تجویز دی گئی ہے، جسے مجموعی سہ ماہی ایڈجسٹمنٹ کا حصہ بنایا گیا ہے۔
درخواست میں مزید کہا گیا ہے کہ جولائی سے ستمبر 2026 کی سہ ماہی ایڈجسٹمنٹ کا اطلاق کراچی کے بجلی صارفین پر بھی ہوگا اور کے الیکٹرک کے صارفین بھی اس سے متاثر ہوں گے۔
نیپرا حکام کے مطابق تقسیم کار کمپنیوں کی درخواست پر 17 نومبر کو سماعت ہوگی، جس میں متعلقہ حکام دلائل دیں گے۔ سماعت کے بعد نیپرا فیصلہ کرے گا کہ بجلی فی یونٹ کتنی مہنگی کی جائے گی اور صارفین پر اضافی مالی بوجھ کس حد تک پڑے گا۔
یہ بھی پڑھیں:خوفناک ٹریفک حادثات میں 13 افراد جاں بحق، 30 سے زائد زخمی
فیصلے کے بعد ہی بجلی صارفین کو فی یونٹ اضافے اور ممکنہ اضافی بلوں کے بارے میں حتمی صورتحال معلوم ہوسکے گی۔
