9 نومبر کو ملک بھر میں عام تعطیل کا اعلان، نوٹیفکیشن جاری
تفصیلات کے مطابق کابینہ ڈویژن کی جانب سے جاری نوٹیفکیشن میں 9 نومبر کو اقبال ڈے کے سلسلے میں سرکاری تعطیل قرار دیا گیا ہے۔ اس اعلان کے بعد ملک بھر میں سرکاری دفاتر اور متعلقہ ادارے بند رہیں گے۔
اس سے قبل پنجاب حکومت بھی صوبے بھر میں 9 نومبر کو عام تعطیل کا اعلان کرچکی ہے، محکمہ سروسز اینڈ جنرل ایڈمنسٹریشن کے ویلفیئر ونگ کی جانب سے جمعے کو جاری کردہ نوٹیفکیشن کے مطابق پیر 9 نومبر کو پورے پنجاب میں عام تعطیل ہوگی۔
نوٹیفکیشن میں بتایا گیا ہے کہ یہ اعلان 19 جنوری 2026 کو جاری کیے گئے محکمانہ نوٹیفکیشن کے تسلسل میں کیا گیا ہے۔ اس حوالے سے صوبے کے اہم سرکاری عہدیداروں، انتظامی سیکریٹریوں، ڈویژنل کمشنرز، ڈپٹی کمشنرز اور مختلف سرکاری اداروں کے سربراہان کو بھی آگاہ کردیا گیا ہے۔
اقبال ڈے ہر سال 9 نومبر کو شاعرِ مشرق علامہ محمد اقبال کی سالگرہ کے موقع پر منایا جاتا ہے، علامہ اقبال کو پاکستان کا قومی شاعر اور عظیم مفکر مانا جاتا ہے۔ ان کے افکار، شاعری اور فلسفے نے برصغیر کے مسلمانوں میں خودی، آزادی اور الگ قومی شناخت کا شعور اجاگر کرنے میں اہم کردار ادا کیا۔
یہ بھی پڑھیں:پیٹرول اور ڈیزل کی قیمتوں میں بڑی کمی، نوٹیفکیشن جاری
ملک بھر میں اس دن مختلف تقریبات اور خصوصی پروگرامز کے ذریعے علامہ اقبال کی خدمات کو خراجِ عقیدت پیش کیا جاتا ہے۔
