ولیمے کے روز دلہن کو قتل کرنے والا ملزم اپنے انجام کو پہنچ گیا
پولیس نے واقعے کی تصدیق کرتے ہوئے دیگر ملزمان کی گرفتاری کے لیے کارروائی شروع کردی ہے۔
پولیس کے مطابق افسوسناک واقعہ گوجرانوالہ میں سمن آباد کے قریب پیش آیا، جہاں ولیمے کی تقریب سے واپسی پر ملزم سرفراز نے دلہن صبا کو فائرنگ کا نشانہ بنایا تھا، جس کے نتیجے میں وہ موقع پر ہی جاں بحق ہوگئی تھی۔
واقعے کے بعد علاقے میں خوف و ہراس پھیل گیا تھا جبکہ دلہن کے قتل نے اہل خانہ اور شہریوں کو شدید صدمے سے دوچار کردیا تھا۔ پولیس نے واقعے میں ملوث ملزم سرفراز اور اس کے ساتھیوں کی تلاش شروع کردی تھی۔
تازہ ترین پیش رفت میں پولیس نے بتایا ہے کہ دلہن کے قتل میں ملوث مرکزی ملزم سرفراز اپنے ہی ساتھیوں کی فائرنگ سے ہلاک ہوگیا۔ تاہم ملزم کی ہلاکت کے محرکات اور واقعے کی مکمل تفصیلات تاحال سامنے نہیں آسکیں۔
پولیس کے مطابق واقعے میں ملوث دیگر ملزمان کی گرفتاری کے لیے کارروائیاں جاری ہیں اور ان کی تلاش کی جا رہی ہے۔
حکام کا کہنا ہے کہ واقعے کے تمام پہلوؤں کا جائزہ لیا جا رہا ہے تاکہ دلہن کے قتل میں ملوث دیگر افراد کو بھی قانون کے کٹہرے میں لایا جاسکے۔
واضح رہے کہ ولیمے کے روز دلہن کا قتل ایک افسوسناک واقعہ تھا، جس نے شادی کی خوشیوں کو ماتم میں بدل دیا تھا۔
