پنجاب یونیورسٹی میں اساتذہ سراپا احتجاج، وائس چانسلر سے فرانزک آڈٹ کا مطالبہ
جنرل باڈی اجلاس میں پروفیسر ڈاکٹر کامران عابد اور پروفیسر ڈاکٹر محمد اظہر نعیم سے مکمل اظہار یکجہتی کیا گیا۔ اساتذہ نے وائس چانسلر کے اقدامات پر شدید تحفظات کا اظہار کرتے ہوئے کہا کہ اساتذہ کے خلاف مبینہ انتقامی کارروائیاں کسی صورت قبول نہیں کی جائیں گی۔
اجلاس میں مطالبہ کیا گیا کہ پنجاب یونیورسٹی کے مالی اور انتظامی معاملات میں شفافیت یقینی بنائی جائے اور مبینہ مالی بے ضابطگیوں اور بدانتظامی سے متعلق الزامات کی غیر جانب دارانہ تحقیقات کرائی جائیں۔
اساتذہ نے زور دیا کہ اختلاف رائے کو دبانے کے لیے انتظامی اختیارات کے استعمال کا سلسلہ بند کیا جائے اور اساتذہ کے جائز مطالبات تسلیم کیے جائیں۔ اس موقع پر ایک قرارداد بھی منظور کی گئی، جس میں اساتذہ کے حقوق، پیشہ ورانہ وقار اور ادارے کی خودمختاری کے تحفظ پر زور دیا گیا۔
جنرل باڈی اجلاس میں اساتذہ اور یونیورسٹی انتظامیہ کے درمیان جاری کشیدگی ختم کرنے کے لیے بامعنی مذاکرات کی ضرورت پر بھی زور دیا گیا۔ شرکا نے کہا کہ تعلیمی ادارے میں سازگار ماحول برقرار رکھنے اور یونیورسٹی کی ساکھ محفوظ بنانے کے لیے شفاف احتساب ناگزیر ہے۔
اجلاس میں پنجاب حکومت سے مطالبہ کیا گیا کہ وہ اساتذہ کے تحفظات کا نوٹس لے اور معاملے کے حل کے لیے مؤثر اقدامات کرے۔
اساتذہ نے واضح کیا کہ اپنے حقوق کے تحفظ اور مطالبات کی منظوری کے لیے آئینی اور جمہوری جدوجہد جاری رکھی جائے گی۔
