فیلڈ مارشل عاصم منیر کی ایرانی صدر اور مذاکراتی ٹیم سے اہم ملاقاتیں
ایرانی نیوز ایجنسی ارنا کے مطابق ایرانی مذاکراتی ٹیم نے بھی فیلڈ مارشل عاصم منیر سے ملاقات کی۔
ملاقاتوں کے دوران ایران کی جانب سے امریکا پر عدم اعتماد کا اظہار کیا گیا۔ ایرانی خبر رساں ادارے کے مطابق ایران کا مؤقف ہے کہ امریکا اس وقت تک اعتماد حاصل نہیں کرسکتا جب تک وہ ایران کی جانب سے پیش کی گئی سات شرائط پوری نہیں کرتا۔
ایرانی پارلیمنٹ کے اسپیکر محمد باقر قالیباف نے کہا کہ دھمکیاں اور فوجی نقل و حرکت ایران کے فیصلوں پر اثر انداز نہیں ہوسکتیں۔ ان کے مطابق امریکی نائب صدر کو واضح طور پر بتایا گیا ہے کہ اسلامی انقلاب سے پہلے اور بعد میں امریکا کے ایران مخالف اقدامات نے ایرانی عوام کے دلوں میں گہری بداعتمادی پیدا کی ہے۔
یہ بھی پڑھیں: نئی آٹو پالیسی 2031-2026 کی منظوری، آئی ایم ایف کی تجویز مسترد
باقر قالیباف کا کہنا تھا کہ ٹرمپ انتظامیہ کی جانب سے اسلام آباد میں طے پانے والی مفاہمت کی خلاف ورزی اور بار بار دھمکیاں دینے سے یہ بداعتمادی مزید بڑھ گئی ہے۔ انہوں نے کہا کہ ایران کے پاس اس معاملے پر کہنے کے لیے کوئی نئی بات نہیں۔
ایرانی پارلیمنٹ کے اسپیکر نے مزید کہا کہ امریکا ایران کا اعتماد اس وقت تک حاصل نہیں کرسکتا جب تک نیویارک میں پیش کی گئی ایران کی سات شرائط پوری نہیں کی جاتیں۔ ان کے مطابق دھمکیوں اور فوجی مشقوں سے ایران کے تزویراتی فیصلے تبدیل نہیں ہوں گے۔
باقر قالیباف نے الزام عائد کیا کہ امریکا نے غلط اندازوں اور ایران کے خلاف جنگ چھیڑ کر خود کو ایک دلدل میں پھنسا لیا ہے، اب اس صورت حال سے نکلنے کے لیے ضروری اقدامات کرنا امریکا کی ذمہ داری ہے۔
