وزیراعظم اپنا گھر پروگرام میں اپلائی کرنے والوں کیلئے خوشخبری
اب قرض کیلئے ضروری دستاویزات کی تعداد کم کرکے پانچ کردی گئی ہے، اس اقدام کا مقصد بینکوں سے قرض کے حصول کے عمل کو آسان اور تیز بنانا ہے۔
وزارت ہاؤسنگ اینڈ ورکس کے ترجمان کے مطابق ہاؤسنگ فنانس کیلئے درکار دستاویزات کو محدود اور معیاری بنانے کے حوالے سے بینکوں کو ہدایات جاری کردی گئی ہیں، تاکہ درخواست گزاروں کو غیر ضروری کاغذی کارروائی سے نجات مل سکے۔
اعلامیے کے مطابق ہاؤسنگ قرض کیلئے ضروری پانچ دستاویزات میں ٹرانسفر لیٹر، پوزیشن لیٹر، نقشہ، رہن رکھنے کی اجازت کا خط اور اندراجِ رہن شامل ہیں۔ ان دستاویزات کی بنیاد پر بینک ہاؤسنگ فنانس کی درخواستوں پر کارروائی کرسکیں گے۔
وزارت ہاؤسنگ اینڈ ورکس کے ترجمان نے کہا کہ وزیراعظم اپنا گھر پروگرام ملک بھر میں جاری ہاؤسنگ قرضوں کا ایک اہم منصوبہ ہے۔ اس اسکیم کے تحت حکومت پاکستان پہلی بار گھر بنانے کیلئے شہریوں کو ایک کروڑ روپے تک قرض فراہم کررہی ہے۔
وزارت کے مطابق دستاویزات کی تعداد کم کرنے اور طریقہ کار کو یکساں بنانے سے درخواست گزاروں کیلئے قرض حاصل کرنا نسبتاً آسان ہوسکے گا۔ اس اقدام سے بینکوں کیلئے بھی درخواستوں کی جانچ پڑتال اور کارروائی کے عمل کو بہتر بنانے میں مدد ملنے کی توقع ہے۔
یہ بھی پڑھیں:پنجاب میں 3 لاکھ خاندانوں کو بلاسود قرضے دینے کا ہدف مقرر
گھر کی تعمیر کے خواہش مند افراد کیلئے یہ سہولت اہم پیش رفت ہے، کیونکہ قرض کے حصول کے دوران کاغذی کارروائی اکثر مشکلات کا باعث بنتی ہے۔
