وزیراعظم شہباز شریف نے اسلام آباد میں دانش اسکول کا افتتاح کردیا
تقریب سے خطاب کرتے ہوئے وزیراعظم نے کہا کہ پاکستانی نوجوانوں میں اپنی زندگیاں سنوارنے اور ملک کی تقدیر بدلنے کی بھرپور صلاحیت موجود ہے۔
انہوں نے کہا کہ دانش اسکولز کے طلبہ کی کامیابیوں کو متاثر کن قرار دیا اور کہا کہ نوجوان اپنی ذہانت، محنت اور انتھک کوششوں سے پاکستان کو اقوامِ عالم میں نمایاں مقام دلا سکتے ہیں۔
ان کا کہنا تھا کہ غریب گھرانوں کے بچے ایچی سن جیسے اداروں میں تعلیم حاصل کرنے کا تصور بھی نہیں کرسکتے، اسی لیے 2010 میں دانش اسکول جیسے تعلیمی اداروں کی بنیاد رکھی گئی۔
یہ بھی پڑھیں: بلوچستان میں سیکیورٹی فورسز کی بڑی کارروائیاں، 8 دہشت گرد ہلاک
شہباز شریف نے کہا کہ کراچی سے پشاور تک ہر بچے اور بچی کو تعلیم اور ترقی کے مساوی مواقع ملنے چاہئیں۔ دانش اسکولز نے ثابت کیا ہے کہ پاکستانی قوم رنگ، نسل اور صوبائی تفریق سے بالاتر ہو کر متحد ہے۔
انہوں نے بتایا کہ دانش اسکولز کا منصوبہ پنجاب سے نکل کر اب پورے پاکستان میں پھیل رہا ہے اور مختلف علاقوں میں ان اسکولوں کی تعمیر جاری ہے۔
وزیراعظم نے مزید کہا کہ دانش اسکولز میں جدید انفارمیشن ٹیکنالوجی (آئی ٹی) اور مصنوعی ذہانت (اے آئی) کی لیبارٹریز بھی قائم کی جائیں گی تاکہ طلبہ کو جدید تعلیم اور ٹیکنالوجی سے آراستہ کیا جاسکے۔
