پی ٹی آئی پر بطور جماعت پابندی ہوگی: فیصل واوڈا
نجی ٹی وی پروگرام میں سابق وفاقی وزیر فیصل واوڈا نے خیبرپختونخوا میں ایمرجنسی اور گورنر راج کے حوالے سے گفتگو کرتے ہوئے کہا کہ 6 مہینے میں کوئی کچھ ریورس نہیں ہو رہا، 6 مہینے میں دہشت گردی کیسے ختم ہو سکتی ہے؟ 6 مہینے میں آپ کیا کر سکیں گے؟ 6 مہینے میں ایک سمت دینی ہے اور ناکام ہونے کا کوئی موقع نہیں ہے۔
فیصل واوڈا نے کہا کہ خیبرپختونخوا کی موجودہ کابینہ کے 75 فیصد لوگوں کو جانتا ہوں وہ قابل ہیں، اس کابینہ نے 5 فیصد بھی کام کیا تو پی ٹی آئی فارغ ہو جائے گی۔
پی ٹی آئی کے حوالے سے بات کرتے ہوئے ان کا کہنا تھا کہ جن کے باپ دادا کے پاس کچھ نہیں تھا وہ اب امیر ہو گئے ہیں، عوام کے پاس تو کچھ بھی نہیں ہے، عوام کسی لیڈر کے پیچھے نکلنے کو تیار نہیں ہیں، کسی لیڈر نے بھی عوام کو ڈیلیور نہیں کیا ہے۔
یہ بھی پڑھیں: کے پی میں دہشتگردی پر قابو پانے کے بعد نظام صوبائی حکومت کے حوالے کر دیں گے، طارق فضل چوہدری
ان کا کہنا تھا کہ صرف خیبرپختونخوا نہیں بلکہ باقی جگہوں پر بھی ایسی صورت حال ہے، بلوچستان اور خیبرپختونخوا کی صورت حال میں فرق ہے، جب دہشت گردوں کو ختم کرنے میں رکاوٹ بنیں گے تو ایسا ہو گا۔
فیصل واوڈا نے کہا کہ دہشت گردی کے مسئلے پر خیبرپختونخوا میں ایمرجنسی لگی ہے، فیصل کریم کنڈی سے میری بات ہوئی ہے اور انہوں نے گزشتہ 5 دنوں میں اچھے اقدامات کیے ہیں۔
انہوں نے کہا کہ مولانا فضل الرحمان ہمیشہ پاک فوج کے ساتھ کھڑے رہے ہیں، انہیں اگر کوئی تحفظات ہیں تو ہم اس حوالے سے ان سے بات چیت کریں گے، بعض اوقات مس انڈر اسٹینڈنگ بھی ہو جاتی ہے، اس وقت جو باتیں کی جا رہی ہیں وہ تکلیف دہ ہیں، مولانا کے ساتھ احترام والا رشتہ ہے۔
