کن شہروں میں بادل برسیں گے؟ الرٹ جاری
پی ڈی ایم اے کے مطابق مغربی ہواؤں کا سلسلہ ہفتے سے ملک کے بالائی علاقوں میں داخل ہوگیا ہے، جس کے باعث پنجاب کے مختلف علاقوں میں بارش اور تیز ہوائیں چلنے کا امکان ہے۔ بارشوں کے اس سلسلے کے دوران شہری اور دیہی علاقوں میں موسم تبدیل ہونے کی توقع ہے۔
محکمہ کی پیشگوئی کے مطابق لاہور، راولپنڈی، مری، گلیات، اٹک، چکوال، جہلم، منڈی بہاؤالدین، گجرات اور گوجرانوالہ میں بارش متوقع ہے۔
اس کے علاوہ حافظ آباد، وزیرآباد، قصور، شیخوپورہ، سیالکوٹ، نارووال اور میانوالی میں بھی تیز ہواؤں کے ساتھ بارش ہوسکتی ہے۔
پی ڈی ایم اے کے مطابق فیصل آباد، خوشاب، بھکر، سرگودھا، جھنگ اور ٹوبہ ٹیک سنگھ میں بھی وقفے وقفے سے بارش ہونے کا امکان ہے۔ شہریوں کو موسم کی صورتحال پر نظر رکھنے اور احتیاطی تدابیر اختیار کرنے کی ہدایت کی گئی ہے۔
دوسری جانب مری، گلیات اور دیگر پہاڑی علاقوں میں ممکنہ لینڈ سلائیڈنگ کے خدشے کے پیش نظر متعلقہ اداروں کو ضروری اقدامات کرنے کی ہدایت کی گئی ہے تاکہ کسی بھی ہنگامی صورتحال سے مؤثر انداز میں نمٹا جاسکے۔
یہ بھی پڑھیں:خیبرپختونخوا میں گورنر راج لگانے کا فیصلہ
پی ڈی ایم اے نے متعلقہ محکموں کو الرٹ رہنے کی ہدایت کرتے ہوئے عوام سے اپیل کی ہے کہ بارشوں کے دوران احتیاط کریں اور پہاڑی علاقوں میں سفر کرتے وقت خصوصی توجہ دیں۔ شہریوں کو چاہیے کہ تیز ہواؤں اور خراب موسم کے دوران غیر ضروری سفر سے گریز کریں۔
