خیبرپختونخوا میں آپریشن کی اجازت نہیں دوں گا، سہیل آفریدی
میڈیا سے گفتگو کرتے ہوئے وزیراعلیٰ سہیل آفریدی نے کہا کہ سیاسی قوتیں مذاکرات پر یقین رکھتی ہیں، خواہش تھی کہ تمام مسائل بات چیت کے ذریعے حل کیے جائیں، ہم چاہتے ہیں کہ بانی پاکستان تحریک انصاف (پی ٹی آئی) سے ملاقات ہو اور ان کا علاج کرایا جائے۔
سہیل آفریدی کا کہنا تھا کہ مخالفین جتنے غیرقانونی اقدامات کرنا چاہتے ہیں، کرتے رہیں، پرامن احتجاج ہمارا آئینی حق ہے۔
انہوں نے کہا کہ کوئی گورنر راج کی دھمکیاں دے رہا ہے تو کوئی سیکیورٹی کے نام پر ڈرانے کی کوشش کر رہا ہے، لیکن ان اقدامات سے پیچھے نہیں ہٹیں گے۔
وزیراعلیٰ نے خبردار کیا کہ اگر گورنر راج نافذ کیا گیا تو اس پر ردعمل پی ٹی آئی یا وزیراعلیٰ کی جانب سے نہیں بلکہ عوام کی طرف سے آئے گا، اس جنگ کو مشترکہ طور پر جیتیں گے۔
گورنر کی جانب سے اجلاس طلب کیے جانے پر سہیل آفریدی نے اعتراض کرتے ہوئے اسے غیرآئینی اقدام قرار دیا۔
انہوں نے مزید کہا کہ اگر مذاکرات کے دوران خیبرپختونخوا میں آپریشن کی اجازت دینے کا مطالبہ کیا گیا تو اسے کسی صورت قبول نہیں کیا جائے گا۔
