اپنی چھت اپنا گھر پروگرام: مستحقین کی دوسری قرض قسط منظور
محکمہ خزانہ اور پنجاب ہاؤسنگ اینڈ ٹاؤن پلاننگ ایجنسی کے درمیان قسطوں کے اجرا سے متعلق انتظامی پیچیدگی دور ہونے کے بعد دوسری قرض قسط جاری کرنے کی منظوری دی گئی ہے۔ محکمہ خزانہ کی جانب سے پروگرام میں مالی منصوبہ بندی سے متعلق غلطی کی نشاندہی بھی کی گئی تھی۔
دستاویزات کے مطابق زیرالتوا دوسری قسطوں کیلئے 6 ارب 39 کروڑ 20 لاکھ روپے منظور کیے گئے ہیں۔ یہ رقم نئی ضمنی گرانٹ کے بجائے پروگرام کے ریوالونگ فنڈ سے حاصل ہونے والی وصولیوں کے ذریعے ادا کی جائے گی۔
حکومت نے اس رقم کے استعمال کی اجازت صرف ایک مرتبہ خصوصی رعایت کے طور پر دی ہے۔ دستاویزات کے مطابق متعلقہ ادارے نے دوسری قسطوں کیلئے رقم محفوظ رکھے بغیر نئے مستحقین کو پہلی قرض قسطیں جاری کردی تھیں، جس کے باعث دوسری قسطوں کے اجرا میں مالی پیچیدگی پیدا ہوئی۔
محکمہ خزانہ نے مالی منصوبہ بندی کی غلطی آئندہ دوبارہ نہ دہرانے کی ہدایت کرتے ہوئے واضح کیا ہے کہ پہلے فراہم کیے گئے 20 ارب روپے پروگرام کی دونوں قرض اقساط کی ضروریات پوری کرنے کیلئے مختص تھے۔
منظور شدہ 6 ارب 39 کروڑ 20 لاکھ روپے سے زائد ادائیگی کی اجازت نہیں ہوگی، جبکہ خصوصی اجازت کو مستقبل میں کسی اضافی مالی مطالبے کی مثال بھی نہیں بنایا جاسکے گا
محکمہ خزانہ کے مطابق آئندہ قرضوں کا اجرا بینک آف پنجاب کے ساتھ طے شدہ مالی فریم ورک کے مطابق ہوگا اور طریقہ کار سے انحراف کیلئے متعلقہ مجاز فورم کی پیشگی منظوری ضروری ہوگی۔
یہ بھی پڑھیں:عمران خان کا طبی معائنہ کرنے والے ڈاکٹر فرقاد عالمگیر کون ہیں؟ جانیے
پروگرام کے تحت قرض اقساط کی مجموعی وصولیاں 13 ارب 57 کروڑ 80 لاکھ روپے تک پہنچ چکی ہیں۔ قرض واپسی کے مرحلے میں شامل ایک لاکھ 25 ہزار 734 مستحقین میں سے 98.36 فیصد بروقت ادائیگیاں کررہے ہیں۔
