پی ٹی آئی ڈٹ گئی، کل سے لانگ مارچ شروع کرنے کا اعلان

تفصیلات کے مطابق پی ٹی آئی کی سیاسی اور کور کمیٹی نے رات گئے اجلاس میں فیصلہ کرتے ہوئے لانگ مارچ کی منسوخی کو بانی چیئرمین کی ملاقات سے مشروط کردیا۔

رات گئے اجلاس میں بیرسٹر گوہر اور سلمان اکرم راجہ نے حکومت سے مذاکرات پر بریفنگ دی، بریفنگ میں واضح کیا گیا کہ لانگ مارچ سے صوبائی حکومت اور پی ٹی آئی کے خلاف وفاق ممکنہ طور اقدام اٹھا سکتا ہے۔

یہ بھی پڑھیں: لانگ مارچ کیلئے ایک دن میں 4 کروڑ روپے جمع ہو گئے، سہیل آفریدی

سیاسی اور کور کمیٹی کے اجلاس میں حکومتی ممکنہ اقدام سے بچنے کے لیے لانگ مارچ ملتوی کرنے کی تجویز دی گئی، تاہم وزیراعلٰی سہیل آفریدی نے لانگ مارچ ملتوی نہ کرنے کا فیصلہ کرتے ہوئے اجلاس میں موقف اپنایا کہ لانگ مارچ بانی چیئرمین ہی ملتوی کرسکتے ہیں۔

وزیراعلٰی سہیل آفریدی نے اجلاس سے خطاب میں کہا کہ آج حکومت سے مذاکرات میں بانی چیئرمین سے ملاقات کی شرط رکھی جائے۔