پی ٹی آئی کا لانگ مارچ 5 اکتوبر تک ملتوی کرنے کا فیصلہ
میڈیا رپورٹس کے مطابق پی ٹی آئی کی اعلیٰ قیادت کے مشاورتی اجلاس میں لانگ مارچ سمیت دیگر سیاسی امور پر تفصیلی غور کیا گیا، جس کے بعد لانگ مارچ کی تاریخ 5 اکتوبر تک مؤخر کرنے پر اتفاق کیا گیا۔
ذرائع کا کہنا ہے کہ پی ٹی آئی قیادت کی جانب سے لانگ مارچ کی نئی تاریخ اور آئندہ کے سیاسی و عملی لائحہ عمل سے متعلق تفصیلی ہدایات جلد جاری کی جائیں گی۔ اس سے قبل پی ٹی آئی کی اعلیٰ قیادت کے ایک اہم اجلاس میں شرکا کی اکثریت نے مجوزہ لانگ مارچ کو چند روز کے لیے مؤخر کرنے کی تجویز دی تھی۔
اجلاس کے شرکا کو بتایا گیا کہ پی ٹی آئی قیادت اس وقت جمعیت علمائے اسلام (ف) اور پاکستان پیپلز پارٹی سے بھی رابطے میں ہے، جبکہ اہم سیاسی معاملات پر مشاورت جاری ہے۔ پی ٹی آئی کی جانب سے 6 سے 10 اکتوبر کے درمیان آل پارٹیز کانفرنس (اے پی سی) بلانے کی تجویز پر بھی غور کیا جا رہا ہے۔
یہ بھی پڑھیں: پی ٹی آئی لانگ مارچ: فیض آباد کے ہوٹلز بند کرا دیے گئے
اجلاس کے دوران بعض ارکان نے محمود خان اچکزئی اور راجہ ناصر عباس کے سیاسی کردار کے حوالے سے اپنے تحفظات کا اظہار بھی کیا۔
دوسری طرف پی ٹی آئی خیبرپختونخوا کے سیکرٹری اطلاعات شوکت یوسفزئی نے لانگ مارچ ختم کرنے کی خبروں کی تردید کرتے ہوئے کہا کہ اس متعلق کوئی فیصلہ نہیں کیا، تحریک انصاف کی تیاری مکمل ہے۔
انہوں نے کہا کہ وفاقی حکومت مذاکرات کرے تو لانگ مارچ سے متعلق کچھ فیصلہ ہوسکتا ہے، لانگ مارچ پرامن ہوگا اور سرکاری وسائل استعمال نہیں ہوں گے۔
پی ٹی آئی رہنما کا کہنا تھا کہ وفاقی حکومت نے کنٹینرز کے ذریعے راستے بند کرکے عدالتی فیصلےکی خلاف ورزی کی ہے۔
