پی ٹی آئی مارچ، کے پی حکومت کی سرکاری افسران اور وسائل کے استعمال پر پابندی
چیف سیکرٹری خیبرپختونخوا نے تمام متعلقہ افسران کو عدالتی احکامات پر من و عن عملدرآمد یقینی بنانے کی ہدایت کی ہے۔ آفس میمورنڈم میں کہا گیا ہے کہ اگر کسی سرکاری افسر کو مارچ میں شرکت کے لیے کہا جائے تو وہ فوری طور پر چیف سیکرٹری یا انسپکٹر جنرل پولیس کو آگاہ کرے۔
میمورنڈم کے مطابق کوئی بھی سرکاری افسر اسلام آباد کی جانب مارچ، ریلی یا جلوس میں معاونت یا سہولت فراہم نہیں کرے گا۔
یہ بھی پڑھیں: اسلام آباد پر کسی کو چڑھائی کی اجازت نہیں دیں گے، محسن نقوی
حکومت کی جانب سے جاری ہدایات میں کہا گیا ہے کہ ایسے کسی مارچ یا ریلی کی اجازت نہیں دی جائے گی جس سے اسلام آباد میں آزادانہ نقل و حرکت، تجارتی و کاروباری سرگرمیوں، تعلیمی اداروں یا طبی سہولیات تک رسائی متاثر ہونے کا خدشہ ہو۔
ہدایات کے مطابق کسی بھی مارچ یا ریلی کے لیے سرکاری گاڑی، مشینری، آلات، عوامی فنڈز یا دیگر سرکاری وسائل استعمال نہیں کیے جاسکیں گے۔
میمورنڈم میں واضح کیا گیا ہے کہ عدالتی احکامات کی خلاف ورزی کرنے والے سرکاری افسر کے خلاف محکمانہ کارروائی عمل میں لائی جائے گی۔
اس کے علاوہ کسی رکاوٹ یا ناخوشگوار واقعے کی اطلاع دینے کے لیے ہیلپ لائن 091-9210068 بھی فراہم کردی گئی ہے۔
